વડોદરામાં પતિ-પત્ની વચ્ચે બાળકી પર માર મારવા મુદ્દે વિવાદ થયો,સામાન્ય બોલાચાલી થોડા જ સમયમાં ઉગ્ર ઝઘડામાં ફેરવાઈ.
- ગુસ્સામાં આવી પતિએ પત્નીનું ગળું દબાવી મોતને ઘાટ ઉતારી.
- ઘટના બાદ મહિલા બેહોશ, હોસ્પિટલ ખાતે મૃત જાહેર,પોલીસએ પતિને કસ્ટડીમાં લઈ હત્યાનો ગુનો નોંધ્યો.
- દંપતિ વચ્ચે બાળકી અંગે પહેલાંથી જ તણાવ રહેતો હોવાનું પ્રાથમિક તપાસમાં જાણવા મળ્યું.
વડોદરા શહેરના તાંદલજા વિસ્તારના મહાબલીપુરમ વિસ્તારમાં રવિવારે મોડી રાત્રે ઘરેલુ ઝઘડામાં એક ચોંકાવનારી ઘટના બની છે, જેમાં પતિ કાસિમ શબ્બીરભાઈ શેખે પોતાની પત્ની મિસબા ઉર્ફે આરજૂનું ગળું દબાવીને હત્યા કરી દીધી હોવાનું સામે આવ્યું છે.મિસબા કોઈ કારણસર બાળકીને મારતી હતી, જેને લઇ પતિએ તેની અટક કરી હતી, જેના કારણે ઝઘડો થયો અને એવુ ઘટના બની.
રવિવારે રાત્રે મિસબા કોઈ કારણસર બાળકીને માર મારી રહી હતી, જેથી પતિ કાસીમે તેને આમ કરવાથી રોકી હતી.પતિએ વારંવાર ના પાડવા છતાં પત્નીએ 6 મહિનાની બાળકી ને માર મારવાનું ચાલુ રાખ્યું હતું. બંને વચ્ચે બોલાચાલી થતાં પત્નીએ પતિને કહ્યું કે, ‘તમે કોઈ કામ કરતા નથી, પૈસા કમાવાની ઓકાત નથી અને મને સલાહ આપો છો.’
આ સાંભળી કાસીમ ગુસ્સે ભરાયો હતો. તેણે પોલીસ સમક્ષ કબૂલાત કરી કે, “મેં માર મારવાની ના પાડતા તેણે માર મારવાનું ચાલુ રાખતા મને ગુસ્સો આવી ગયો હતો અને તેનું ગળું દબાવી દીધું હતું.’
ઘટના બાદ મહિલા બેહોશ થઈ જતાં પરિવારજનો અને પડોશીઓએ તાત્કાળ એને હોસ્પિટલ પહોંચાડવાની કોશિશ કરી, પરંતુ સારવાર પહેલા જ તેને મૃત જાહેર કરવામાં આવી હતી. ઘટનાની જાણ થતાં પોલીસ સ્થળ પર પહોંચી હતી અને આરોપી પતિને કસ્ટડીમાં લીધો છે.
આ બનાવની જાણ થતાં જેપી રોડ પોલીસ સ્ટેશનનો કાફલો ઘટનાસ્થળે અને મિસબાના પરિવારજન પાસે પહોંચ્યો હતો. પોલીસે કાસીમને પણ પોલીસ સ્ટેશન લાવી પૂછપરછ કરતાં તેણે પત્નીનું ગળું દબાવી દીધું હોવાની કબૂલાત કરી હતી. પોલીસ જ્યારે મહાબલીપુરમના મકાનમાં પહોંચી ત્યારે મિસબા ભોંય તળિયે મૃત હાલતમાં પડેલી હતી. પોલીસે તાત્કાલિક હત્યાનો ગુનો નોંધી પતિ કાસીમ સામે કાયદેસરની કાર્યવાહી હાથ ધરી છે.
