અરબ સાગરમાં ATS અને ICGનો સૌથી મોટો સપાટો: 3000 કરોડથી વધુની કિંમતનું ડ્રગ્સ જપ્ત, 5 પાકિસ્તાની નાગરિકોની ધરપકડ

• ઐતિહાસિક રેકોર્ડબ્રેક જપ્તી: અરબ સાગરમાં ATS અને ICGના સંયુક્ત ઓપરેશનમાં 3000 કરોડથી વધુનું 526 કિલો ડ્રગ્સ જપ્ત કરાયું.
• 5 પાકિસ્તાની ઝડપાયા: લક્ષદ્વીપ નજીક મધ્ય સમુદ્રમાં ઈરાની બોટને આંતરીને 5 પાકિસ્તાની નાગરિકોની ધરપકડ કરવામાં આવી.
• હાઈ ગ્રેડ નશીલા પદાર્થો: બોટમાંથી પ્યોર હેરોઈન અને મેથમફેટામાઇનનો જથ્થો કોથળાઓમાંથી મળી આવ્યો.
• મુંબઈમાં સંયુક્ત પૂછપરછ: પકડાયેલા આરોપીઓ અને મુદ્દામાલને મુંબઈ બંદરે લાવીને કેન્દ્રીય એજન્સીઓ દ્વારા સઘન તપાસ શરૂ કરાઈ છે.

ગુજરાત એન્ટી ટેરરિઝમ સ્ક્વોડ (ATS) અને ભારતીય તટરક્ષક દળ (ICG) ની સંયુક્ત ટીમે સુરક્ષા એજન્સીઓના ઇતિહાસમાં અત્યાર સુધીનું સૌથી સફળ અને મોટું ઓપરેશન પાર પાડવામાં મોટી સફળતા મેળવી છે. અરબ સાગરમાં આંતરરાષ્ટ્રીય ડ્રગ્સ તસ્કર સિન્ડિકેટની ગતિવિધિઓ પર સકંજો કસીને લક્ષદ્વીપના પશ્ચિમે મધ્ય સમુદ્રમાંથી એક શંકાસ્પદ ઈરાની બોટને આંતરવામાં આવી હતી. આ બોટમાંથી અંદાજે 526 કિલોગ્રામ જેટલો જંગી અને હાઈ ગ્રેડ નશીલા પદાર્થોનો જથ્થો જપ્ત કરવામાં આવ્યો છે,જ્યારે આંતરરાષ્ટ્રીય બજારમાં આ ડ્રગ્સની કિંમત રૂપિયા 3000 કરોડથી પણ વધુ આંકવામાં આવી રહી છે. આ ઓપરેશન દરમિયાન બોટ પર સવાર 5 પાકિસ્તાની નાગરિકોને રંગે હાથે દબોચી લેવામાં આવ્યા છે.

પ્રાપ્ત વિગતો અનુસાર, ગુજરાત ATS ને ચોક્કસ ગુપ્ત બાતમી મળી હતી કે દરિયાઈ માર્ગે કરોડો રૂપિયાનું ડ્રગ્સ ભારતના કિનારે અથવા આસપાસના વિસ્તારોમાં ઘૂસાડવાનો નાપાક પ્રયાસ થઈ રહ્યો છે. આ બાતમીના આધારે કોસ્ટ ગાર્ડ દ્વારા દરિયામાં હાઇ-ટેક જહાજો અને સર્વેલન્સ વિમાનોની મદદથી સઘન મોનિટરિંગ અને વોચ ગોઠવવામાં આવી હતી. ગત 25 સપ્ટેમ્બરે અરેબિયન સીમાં શંકાસ્પદ ઈરાની બોટ નજરે પડતા જ કોસ્ટ ગાર્ડના જહાજે તેનો ફિલ્મીઢબે ‘હોટ પર્સ્યુટ’ (પીછો) કર્યો હતો. દરિયાની વચ્ચે જ બોટને ચારેય બાજુથી ઘેરી લઈને ભારતીય કમાન્ડોએ બોટ પર ધામા નાખ્યા હતા અને તલાશી લેતા કોથળાઓમાં છુપાવેલું પ્યોર હેરોઈન અને મેથમફેટામાઇનનો મોટો જથ્થો મળી આવ્યો હતો.

પકડાયેલા તમામ પાકિસ્તાની તસ્કરો, ઝડપાયેલી ઈરાની બોટ અને 3000 કરોડ રૂપિયાના આ જંગી ડ્રગ્સના જથ્થાને કોસ્ટ ગાર્ડ દ્વારા સુરક્ષિત રીતે મુંબઈ બંદરે લાવવામાં આવ્યા છે. હાલમાં મુંબઈ ખાતે ગુજરાત ATS, કોસ્ટ ગાર્ડ, નાર્કોટિક્સ કંટ્રોલ બ્યુરો (NCB) અને અન્ય કેન્દ્રીય તપાસ એજન્સીઓ દ્વારા આ પાકિસ્તાની નાગરિકોની કડક અને સંયુક્ત પૂછપરછ હાથ ધરવામાં આવી છે. આ ડ્રગ્સનો આ જથ્થો કોણે મોકલ્યો હતો અને ભારતમાં કે અન્ય કયા દેશોમાં કયા નેટવર્ક સુધી પહોંચાડવાનો હતો તે દિશામાં એજન્સીઓએ તપાસનો ધમધમાટ વધુ તેજ કર્યો છે.