કરજણ તંત્રની બેધારી નીતિ: કંડારીમાં તળાવ પૂરી દેવાનું કૌભાંડ, તો શહેરમાં માવજત વગર ગ્રીનરી સુકાઈ!

• જળસંચયની વાતો હવામાં: કંડારી ગામે સરકારી તળાવમાં માટી નાખી પૂરી દેવાનો ગંભીર આક્ષેપ; કલેક્ટર સુધી પહોંચી ફરિયાદ.
• ગ્રીનરી કે ‘બ્રાઉનરી’?: કરજણ નગરપાલિકાના રોડ પર લાખોના ખર્ચે ઉછેરેલા છોડ પાણી વગર સુકાઈને ખાખ.
• જનતાનો સવાલ: સરકાર એક તરફ જળ અભિયાન ચલાવે છે, તો બીજી તરફ પંચાયત તળાવ કેમ પૂરે છે?
• બેદરકારીની પરાકાષ્ઠા: પર્યાવરણના જતન માટે લગાવેલા વૃક્ષો અત્યારે તંત્રની માવજત ઝંખી રહ્યા છે.

​કરજણ: સરકાર એક તરફ જળ સંગ્રહ અને પર્યાવરણ બચાવવા માટે લાખો રૂપિયાનું બજેટ ફાળવે છે, પરંતુ કરજણમાં તંત્રની કાર્યશૈલી કંઈક અલગ જ વાર્તા કહી રહી છે. કરજણ તાલુકાના કંડારી ગામ અને શહેરના મુખ્ય માર્ગો પર તંત્રની ઉદાસીનતાના દ્રશ્યો સામે આવતા સ્થાનિકોમાં ભારે રોષ જોવા મળી રહ્યો છે.

🚤કંડારીમાં તળાવ પૂરવાનું ષડયંત્ર:

કરજણના કંડારી ગામે એક ચોંકાવનારો કિસ્સો સામે આવ્યો છે, જેમાં જળ સંગ્રહ માટેના સરકારી તળાવને માટી નાખીને પૂરી દેવામાં આવ્યું છે. આ મામલે ગ્રામ પંચાયતની મિલીભગત હોવાના આક્ષેપ સાથે ગામના એક જાગૃત યુવાને જિલ્લા કલેક્ટરને લેખિત ફરિયાદ કરી છે. જળસ્તર જાળવવા માટે તળાવ અનિવાર્ય છે, ત્યારે તેને પૂરી દેવાથી ભવિષ્યમાં પાણીની ગંભીર સમસ્યા સર્જાઈ શકે છે.

🪾શહેરની ગ્રીનરી સુકાઈને લાકડા જેવી:

બીજી તરફ, કરજણ નગરપાલિકાની કામગીરી પણ શંકાના દાયરામાં છે. શહેરના મુખ્ય માર્ગોની શોભા વધારવા અને પર્યાવરણના રક્ષણ માટે લગાવવામાં આવેલા ફૂલ-છોડ અને વૃક્ષો પાણીના અભાવે સુકાઈ રહ્યા છે. પાલિકા દ્વારા ગ્રીનરી વિકસાવવાની મોટી મોટી વાતો કરવામાં આવી હતી, પરંતુ યોગ્ય માવજતના અભાવે અત્યારે આ છોડ દયનીય સ્થિતિમાં છે.

🫵સરકારની મોટી મોટી યોજનાઓ અને વાતો કરજણમાં નાની સાબિત થઈ રહી હોય તેવું લાગી રહ્યું છે. હવે જોવાનું એ રહેશે કે કલેક્ટરની ફરિયાદ બાદ કંડારીના તળાવ મુદ્દે શું કાર્યવાહી થાય છે અને નગરપાલિકાના શાસકો ક્યારે કુંભકર્ણની નિદ્રામાંથી જાગે છે.