વડોદરા શહેર ક્રાઈમ બ્રાન્ચે મિલકત સંબંધી ગુનાઓમાં સંડોવાયેલા અને લાંબા સમયથી પોલીસને થાપ આપી નાસતા ફરતા આરોપીઓને પકડવા માટે ખાસ ઝુંબેશ હાથ ધરી હતી. આ દરમિયાન ક્રાઈમ બ્રાન્ચની ટીમને સુરત અને વડોદરાના ગંભીર ગુનાઓમાં વોન્ટેડ એવા આરોપી આલાભાઈ ઉર્ફે લાખાભાઈ જલુને ઝડપી પાડવામાં મોટી સફળતા મળી છે.
- ઓપરેશન અને ધરપકડ: ક્રાઈમ બ્રાન્ચની ટીમ શહેર વિસ્તારમાં પેટ્રોલીંગમાં હતી, ત્યારે મળેલી ચોક્કસ બાતમીના આધારે મકરપુરા એરફોર્સ રોડ પર આવેલા શિવમ ફ્લેટ પાસેથી આલાભાઈ ઉર્ફે લાખાભાઈ ભીમભાઈ જલુને શોધી કાઢવામાં આવ્યો હતો.
- સુરતનો રૂ. 25 કરોડની છેતરપિંડીનો ગુનો: પકડાયેલ આરોપી વર્ષ 2024માં સુરત ડી.સી.બી. પોલીસ સ્ટેશનમાં નોંધાયેલા કરોડોના છેતરપિંડીના ગુનામાં વોન્ટેડ હતો. આ ગુનાની વિગત મુજબ, આરોપીઓએ ફરિયાદીની ડભોઈના ઠીકરીયા ગામની 44 વીઘા જમીન પચાવી પાડવાનું કાવતરું રચ્યું હતું.
- રૂ. 25 કરોડની બાકી રકમ ન ચૂકવી ફરિયાદી સાથે છેતરપિંડી કરી હતી.
- ફર્યાદી પાસેથી પઠાણી ઉઘરાણી કરી, ડરાવી-ધમકાવીને વ્યાજ સહિત કુલ રૂ. 1.85 કરોડ બળજબરીથી પડાવી લીધા હતા.
- આરોપીએ ફરિયાદીના મકાનનો સાટાખત પણ પોતાના નામે કરાવી લીધો હતો.
- અન્ય ગુનાહિત ઇતિહાસ:
- વડોદરા મંજલપુર પોલીસ સ્ટેશન (2025): મારામારી કરી નુકસાન પહોંચાડવાના ગુનામાં પણ તે નાસતો ફરતો હતો.
- મકરપુરા પોલીસ સ્ટેશન (2016): અગાઉ મારામારી અને ધમકી આપવાના ગુનામાં પણ તેની સંડોવણી હતી.
- તપાસનો દોર: વડોદરા ક્રાઈમ બ્રાન્ચે આરોપીની અટકાયત કરી સુરત પોલીસના ઇકો સેલને જાણ કરી હતી. સુરત ઇકો સેલની ટીમ વડોદરા આવી આરોપીનો કબજો મેળવી વધુ તપાસ હાથ ધરી છે.
🚨વડોદરા ક્રાઈમ બ્રાન્ચની આ સતર્કતાને કારણે સુરતના હાઈ-પ્રોફાઈલ ઠગાઈ અને ખંડણીના કેસનો મુખ્ય આરોપી જેલના સળિયા પાછળ ધકેલાયો છે. પોલીસ હાલ આ ગુનામાં સંડોવાયેલા અન્ય આરોપીઓની પણ કડીઓ મેળવી રહી છે.
