બ્યુટી પાર્લરમાં દારૂનું ‘બ્યુટિફિકેશન’: વડોદરા PCBની રેડમાં POPની પાછળથી નીકળી વિદેશી દારૂની ૪૭૬ બોટલો!

વડોદરા શહેરમાં પ્રોહિબિશનની પ્રવૃત્તિઓને નેસ્તનાબૂદ કરવાની પોલીસ કમિશનર નરસિમ્હા કોમારની સૂચનાને પગલે પી.સી.બી. (PCB) એ એક અનોખી રીતે છુપાવેલો દારૂનો જથ્થો ઝડપી પાડ્યો છે. કિશનવાડી વિસ્તારમાં એક રહેણાંક મકાનમાં દરોડો પાડી પોલીસે લાખો રૂપિયાનો વિદેશી દારૂ જપ્ત કર્યો છે.

🧐બ્યુટી પાર્લર અને POP નો ઉપયોગ

પી.સી.બી.ના જવાનોને બાતમી મળી હતી કે, કિશનવાડી વુડાના મકાન પાસે આવેલી પરશોત્તમનગર સોસાયટીમાં રહેતો હિતેષકુમાર જયસ્વાલ પોતાના ઘરમાં દારૂનું વેચાણ કરે છે. તપાસ દરમિયાન પોલીસ પણ ચોંકી ઉઠી હતી, કારણ કે આરોપીએ દારૂનો જથ્થો નીચે મુજબની જગ્યાએ છુપાવ્યો હતો:

• મકાનની અંદર આવેલી બ્યુટી પાર્લરની દુકાનમાં.
• રૂમની છત પર લગાવેલા પી.ઓ.પી. (P.O.P.) ના ખાંચામાં.

✍️મુદ્દામાલની વિગતો

વારસીયા પોલીસ સ્ટેશન વિસ્તારમાં આવેલી આ જગ્યાએથી પોલીસે કુલ રૂપિયા 2,73,820 નો મુદ્દામાલ કબજે કર્યો છે:

• દારૂ/બિયરની બોટલો: 476 નંગ (કિંમત રૂ. 2,61,120/-)
• રોકડ રકમ: રૂ. 7,700/-
• મોબાઈલ ફોન: 1 નંગ (કિંમત રૂ. 5000/-)

🚨પોલીસ કાર્યવાહી

પોલીસે સ્થળ પરથી 45 વર્ષીય આરોપી હિતેષકુમાર રતીલાલ જયસ્વાલની ધરપકડ કરી છે. જોકે, આ દારૂનો જથ્થો પૂરો પાડનાર જીજ્ઞેશ ઉર્ફે જીગો પરમાર નામનો ઈસમ હાલ પોલીસ પકડથી દૂર છે, જેને પકડવા માટે ચક્રો ગતિમાન કરવામાં આવ્યા છે.