હાઈકોર્ટને ઝટકો: દિલ્હી હાઈકોર્ટના જામીન આપવાના આદેશને સર્વોચ્ચ અદાલતે ફગાવ્યો.
- કુલદીપ સિંહ સેંગરના જામીન પર સુપ્રીમ કોર્ટનો સ્ટે, હવે જેલમાં જ રહેશે.
- “આડી-અવળી વાતો છોડો, જામીન કેમ ન રોકવા તેનું કારણ આપો” – સુપ્રીમ કોર્ટ.
- પીડિતા સગીર હતી, આ કેસ અત્યંત ભયાનક અને જઘન્ય છે.
દેશભરમાં ચકચાર મચાવનારા ઉન્નાવ દુષ્કર્મ કેસમાં આજે સુપ્રીમ કોર્ટે એક અત્યંત મહત્વનો અને કડક નિર્ણય લીધો છે. ઉત્તર પ્રદેશના પૂર્વ અને સસ્પેન્ડેડ ભાજપ નેતા કુલદીપ સિંહ સેંગરની મુશ્કેલીઓ વધી છે. દિલ્હી હાઈકોર્ટે સેંગરને જે જામીન આપ્યા હતા, તેના પર સુપ્રીમ કોર્ટે સ્ટે લગાવી દીધો છે. જેનો અર્થ એ છે કે કુલદીપ સેંગર હવે જેલના સળિયા પાછળ જ રહેશે.
આ કેસની સુનાવણી દરમિયાન સુપ્રીમ કોર્ટના જજોએ કુલદીપ સેંગરના વકીલોને જોરદાર ફિટકાર લગાવી હતી. જ્યારે વકીલોએ દલીલો શરૂ કરી ત્યારે કોર્ટે સ્પષ્ટ શબ્દોમાં કહ્યું કે, “તમે આડી-અવળી વાતો કરવાની જગ્યાએ સ્ટે પર વાત કરો. અમે જામીન પર રોક લગાવવા તૈયાર છીએ. જો તમારે જામીન ચાલુ રાખવા હોય તો અમને તેનું સચોટ કારણ જણાવો.”
સીબીઆઈ (CBI) તરફથી હાજર રહેલા સોલિસિટર જનરલ તુષાર મહેતાએ આ કેસને અત્યંત ‘ભયાનક’ ગણાવ્યો હતો. તેમણે કોર્ટને જણાવ્યું કે જ્યારે આ જઘન્ય અપરાધ થયો ત્યારે પીડિતા માત્ર 15 વર્ષની હતી. આ પોક્સો (POCSO) નો ગંભીર મામલો છે અને ગુનો સાબિત થઈ ચૂક્યો હોવા છતાં હાઈકોર્ટે જામીન આપીને ગંભીરતા ન દાખવી હોવાની દલીલ CBIએ કરી હતી.
- 2017: સગીરા પર સત્તાના નશામાં ચૂર ધારાસભ્ય દ્વારા દુષ્કર્મ.
- 2018: પીડિતાનો આત્મહત્યાનો પ્રયાસ અને પિતાનું કસ્ટડીમાં મોત.
- 2019: પીડિતાની કારનો શંકાસ્પદ અકસ્માત અને સુપ્રીમ કોર્ટની દખલ.
- 2019 (ડિસેમ્બર): તીસ હજારી કોર્ટ દ્વારા સેંગરને આજીવન કેદની સજા.
સત્તા, રાજકારણ અને અપરાધની મિલીભગત સામેની આ લડાઈમાં સુપ્રીમ કોર્ટનું વલણ પીડિતા માટે ન્યાયની આશા જગાવનારું છે. હવે આ મામલે આગામી સુનાવણી ચાર અઠવાડિયા પછી હાથ ધરવામાં આવશે. ત્યાં સુધી કુલદીપ સેંગરે જેલમાં જ રહેવું પડશે.
કોર્ટે કુલદીપ સિંહ સેંગરના જામીન પર સ્ટે આપ્યો. CBIની દલીલો બાદ કોર્ટ કડક મૂડમાં જોવા મળી. “આવો ભયાનક ગુનો કરનારને જામીન કેમ?” તેવો સવાલ ઉઠાવી કોર્ટે સેંગરને જેલમાં જ રાખવાનો આદેશ આપ્યો છે.
