• ગ્રામ પંચાયતોના બેંક ખાતા માંથી પોતાના નામે જ ચેક લખી રોકડ રકમ ઉપાડી તલાટી છુમંતર
• જીલ્લા વિકાસ અધિકારીના ધ્યાને ઉચાપત આવતા તાલુકા વિકાસ અધિકારીને ફરિયાદ નોંધવાની સૂચના આપી
• ત્રણેય ગ્રામ પંચાયતના રોજમેળ,બેંક પાસબુક અને વાઉચર બુક પણ ગાયબ કરી દીધા

વડોદરા જીલ્લાના વાઘોડિયા તાલુકાના કરમાલીયાપૂરા ગામ સહીત અન્ય બે ગામોમાં તલાટી કમ મંત્રી તરીકે ફરજ બજાવતા અભિષેક ભરતભાઈ મહેતા એ ગ્રામ પંચાયતના બેંક એકાઉન્ટ માંથી ચેક મારફતે કુલ 21,85,000 રૂપિયા ની ઉચાપત કરી હોવાનું સામે આવતા નાયબ જીલ્લા વિકાસ અધિકારી ના આદેશ અનુસાર તાલુકા વિકાસ અધિકારી એ તલાટી વિરુદ્ધ વાઘોડિયા પોલીસ મથકે નાણાકીય ઉચાપતની ફરિયાદ નોંધાવી છે. જયારે પોલીસે તલાટી ને ભાગેડુ જાહેર કરી તપાસ આરંભી છે.

વડોદરા શહેરના વાઘોડિયા રોડ 304, બાલાજી રેસિડેન્સી, બાપોદ જકાતનાકા ખાતે રહેતા અભિષેક ભરતકુમાર મહેતા વાઘોડિયા તાલુકાના કરમાલીયાપૂરા, જાંબુવાડા અને અંટોલી ગ્રામ પંચાયતમાં તલાટી કમ મંત્રી તરીકે ફરજ બજાવે છે. આ ત્રણેય ગ્રામ પંચાયતના રોજમેળ,વાઉચર અને ચેકબુક તેઓ પાસે રહેતા હતા. જયારે ગત 13 એપ્રિલ 2021 ના રોજ અંટોલી ગ્રામ પંચાયતના ધી બરોડા સેન્ટ્રલ કો.ઓપરેટીવ બેંક વાઘોડિયા શાખાના બેંક એકાઉન્ટ માંથી તેઓએ ચેક નં. 106 અને 108 અભિષેક મહેતા એટલે પોતાના નામે લખી રૂ. 3,40,000 અને 4,10,000 જેટલી મોટી રકમ ઉપાડી લીધી હતી.

આજ રીતે 16 અપ્રિલ 2021 ના રોજ કરમાલીયાપુરા ગ્રામપંચાયતના ધી બરોડા સેન્ટ્રલ કો.ઓપરેટીવ બેંક વાઘોડિયા શાખાના બેંક એકાઉન્ટ માંથી તેઓએ ચેક નં. 129 અને 130 અભિષેક મહેતા એટલે પોતાના નામે લખી રૂ. 4,25,000 અને 3,00,000 જેટલી મોટી રકમ ઉપાડી લીધી હતી. જયારે જાંબુવાડા ગ્રામ પંચાયતના ધી બરોડા સેન્ટ્રલ કો.ઓપરેટીવ બેંક વાઘોડિયા શાખાના બેંક એકાઉન્ટ માંથી ચેક નં. 83 અને 82 દ્વારા અભિષેક મહેતા એટલે પોતાના નામે લખી રૂ. 3,00,000 અને 4,10,000 જેટલી મોટી રકમ ઉપાડી લીધી હતી.

આમ ત્રણેય ગ્રામપંચાયત ના બેંક ખાતામાં ખુદ સરકારી કર્મચારી તલાટી કામ મંત્રી અભિષેક મહેતાએ 21,85,000 રૂપિયા ની ઉચાપત કરી હોવાનું સામે આવ્યું હતુ. તલાટી અભિષેક મહેતાએ પોતાની ઉચાપત છુપાવવા માટે બેંક પાસબુક,ગ્રામપંચાયતના રોજમેળ અને વાઉચરો પણ ગાયબ કરી દીધા હોવાનું સામે આવ્યું છે. આ અંગે જીલ્લા પંચાયતના નાયબ જીલ્લા વિકાસ અધિકારી ના આદેશ અનુસાર તલાટી વિરુદ્ધ વાઘોડિયા પોલીસ મથકે ફરિયાદ દાખાલ કરવામાં આવી છે. સરકારી દસ્તાવેજ મળી આવ્યા બાદ હજી કેટલી ઉચાપત કરવામાં આવી છે તે પ્રકાશમાં આવશે.