કર્મચારીઓનો રામધૂન યોજી માંગણી ન સંતોષાય ત્યાં સુધી લડતનો નિર્ધાર

છેલ્લા 30 વર્ષથી કાયમી થવાની માંગ મુદ્દે નગર પ્રાથમિક શિક્ષણ સમિતિના ચોથા વર્ગના 570 કર્મચારીઓ લડત ચલાવી રહ્યા છે. તેમની માંગણી ન સંતોષાતા તેઓએ આંદોલનનું શસ્ત્ર ઉગામ્યું છે. આજે ત્રીજા દિવસે કર્મચારીઓએ રામધુન યોજી નજર અંદાજ કરતા અધિકારીઓ પદાધિકારીઓને સદબુદ્ધિ માટે પ્રાર્થના કરી હતી.

નગર પ્રાથમિક શિક્ષણ સમિતિના મુખ્યાલય મધ્યવર્તી શાળા ખાતે ચોથા વર્ગના કર્મચારીઓ કાયમી કરવાની માંગ સાથે ગાંધી ચિંધ્યા માર્ગે આંદોલન ચલાવી રહ્યા છે. આજે તેમના આંદોલનનો ત્રીજો દિવસ છે. બે દિવસ દરમિયાન તેમણે તંત્રની આંખો ખોલવા માટે પોતાના હકો ભીખ સ્વરૂપે માંગ્યા હતા.

ત્યારબાદ આજે રામધૂન બોલાવી આંદોલનમાં પ્રાણ ફૂંકયો હતો. કોર્પોરેશન અને નગર પ્રાથમિક શિક્ષણ સમિતિના અધિકારીઓ પદાધિકારીઓ આંદોલનનો નિવેડો લાવવા કોણીએ ગોળ લગાવી રહ્યા છે. કોર્પોરેશને કાયમી અંગેનો નિર્ણય શિક્ષણ સમિતિ ઉપર ઢોળ્યો છે.

તો બીજી તરફ શિક્ષણ સમિતિ કોર્પોરેશનની સહમતી વગર આગળ વધવા તૈયાર નથી. આમ બાય બાય ચારણીના કારણે ત્રસ્ત બનેલા કર્મચારીઓ આંદોલનને વળગી રહ્યા છે. વર્ષોથી લડત ચલાવતા કર્મચારીઓની સમર્થનમાં અગાઉ કોઈ માથું મારતું ન હતું. પરંતુ હવે કર્મચારીઓ લડતના મૂળમાં આવતા રાજકીય લોકો પણ રોટલો શેકવાનો પ્રયાસ કરતા નજરે ચડે છે.