• આર્થિક મદદ કરવાના બહાને નરાધમે પરણીતાને છાણીમાં બોલાવી
• અવાવરી જગ્યાએ લઈ જઇને 5 વર્ષીય પુત્રી સામે જ કારમાં જ દુષ્કર્મ આચર્યું
• પરણીતાએ વિરોધ  કરતા પુત્રીને પણ અડપલા કર્યા  

છેલ્લા દોઢ વર્ષથી ચેઇન સ્નેચીંગના ગુનામાં અમદાવાદ સાબરમતી જેલમાં સજા ભોગવી રહેલા આરોપીની પત્નીને આર્થિક મદદ કરવાના બહાને છાણી બ્રીજથી છાણી ગામ તરફ જવાના રસ્તા ઉપર લઇ જઇ પાંચ વર્ષની માસુમ બાળકી સામે કારમાં બળાત્કાર ગુજારનાર યુવાન સામે છાણી પોલીસ મથકમાં ફરિયાદ નોંધાઇ છે. ફરિયાદમાં એવો પણ આક્ષેપ કરાયો છે કે, હવસખોરે બળાત્કારનો ભોગ બનેલી યુવતીની પાંચ વર્ષની દીકરીની પણ શારીરીક છેડછાડ કરી હતી.

છાણી પોલીસ મથકમાં નોંધાયેલી ફરિયાદ મુજબ વિગત એવી છે કે, શહેરના હરણી-વારસીયા રીંગ રોડ ઉપર રહેતા અને 25 જેટલા ચેઇન સ્નેચીંગ સહિત અન્ય ગુનામાં સેડોવાયેલ ઉમેશ છેલ્લા દોઢ-બે વર્ષથી અમદાવાદ સાબરમતી જેલમાં સજા ભોગવી રહ્યો છે. તેની પત્ની કામીની (નામ બદલ્યું છે) તેના બે સંતાનો સાથે વડોદરામાં રહે છે. અને પોતાનું ગુજરાન ચલાવે છે.

છાણી પોલીસ મથકમાંથી મળેલી માહિતી પ્રમાણે ઉમેશની સાથે અમદાવાદ સાબરમતી જેલમાં ગાંધીનગર જિલ્લાના કલોલ તાલુકાના રાપરડા ગામનો રણછોડ અંબાલાલ પટેલ પણ સજા ભોગવી રહ્યો છે. ઉમેશ અને રણછોડ વચ્ચે જેલમાં મિત્રતા થઇ હતી. આથી ઉમેશ મિત્ર આરોપી રણછોડ પટેલના પુત્ર લાલા (રહે. રાપરડા, તા. કાલોલ, જિ. ગાંધીનગર)ને પણ ઓળખતો હતો. તા.11ના રોજ સાંજના સમયે લાલો પટેલ વડોદરા આવ્યો હતો. અને ઉમેશની પત્ની કામીનીને આર્થિક મદદ કરવાના બહાને ફોન કરીને દશરથ ગામ પાસેના પેટ્રોલ પંપ પાસે બોલાવી હતી.

કામીની પોતાની પાંચ વર્ષની દીકરી સહિત બંને બાળકોને લઇ દશરથ પાસેના પેટ્રોલ પંપ પાસે આર્થિક મદદની આશાએ ગઇ હતી. પેટ્રોલ પંપ પાસે કાર લઇને ઉભેલા લાલા રણછોડ પટેલે કામીનીને પોતાની કારમાં બેસાડી દીધી હતી. અને જણાવ્યું હતું કે, એ.ટી.એમ.માંથી પૈસા ઉપાડવા પડશે. તેમ જણાવી કાર છાણી બ્રિજથી છાણી ગામ તરફના કાચા રસ્તા ઉપર લઇ ગયો હતો. અને રસ્તામાં કામીનીના બંને બાળકો સામે કામીની ઉપર કારમાંજ બળાત્કાર ગુજાર્યો હતો.

લાલા પટેલે બળાત્કાર ગુજાર્યા બાદ કામીની હવસખોર લાલાને પોલીસમાં પકડાવી દેવા માટે તેની સાથે સીટીમાં નટુભાઇ સર્કલ પાસે આવી હતી. સીટીમાં આવતી સમયે હવસખોર લાલાએ કામીનીની સાથે બેઠેલી પાંચ વર્ષની દીકરીની પણ શારીરીક છેડછાડ કરી હતી. દીકરી સાથે પણ લાલાએ છેડછાડ કરતા કામીની ગુસ્સે ભરાતા લાલો કામીનીને આર્થિક મદદ કર્યા વિના કામીની અને તેના બે બાળકોને રસ્તામાં ઉતારી રવાના થઇ ગયો હતો.

દરમિયાન કામીની બંને બાળકો સાથે છાણી પોલીસ મથકમાં પહોંચી હતી. અને હવસખોર લાલા રણછોડ પટેલ (રહે. રાપરડા, તા. કલોલ, જિ. ગાંધીનગર) સામે બળાત્કારની ફરિયાદ નોંધાવી હતી. પોલીસે ફરિયાદના આધારે લાલા પટેલ સામે બળાત્કારનો ગુનો દાખલ કરી ધરપકડના ચક્રોગતિમાન કર્યા છે. આ બનાવની વધુ તપાસ છાણી પી.આઇ. આર.ડી. મકવાણા કરી રહ્યા છે.