• શહેરના વિવિધ પોલીસ મથકમાં નોંધાયેલા 32 જેટલા ગુન્હાઓનો ભેદ ઉકેલાયો
• સાયલેન્સર ચોરી કરીને 5000 રૂ. માં ગેરેજ સંચાલકોને વેચતો
• 50 હજારની કિંમતના સાયલેન્સર વેચી કિંમતી માટી કાઢવામાં આવતી

વડોદરા શહેરના વિવિધ વિસ્તારમાં ઇક્કો કારના સાયલેન્સરની કરી કરતી ટોળકીને વડોદરા ક્રાઇમ બ્રાન્ચે ઝડપી પાડી છે. વડોદરા શહેરમાં 32 જેટલા ગુન્હા આચાર્યા હોવાની કબૂલાત કરતા ખળભળાટ મચી ગયો છે.

મારુતિ સુઝુકી કંપનીની ઇક્કો કારના સાયલેન્સરમાં વાપરવામાં આવતી માટીની કિંમત ખૂબ વધારે છે. આવા સાયલેન્સર બજારમાં 50 હજાર સુધીમાં વેચાય છે. આ સાયેલન્સરની ચોરી કરતા તત્વો વર્ષોથી સક્રિય છે. અને સાયલેન્સરની માટી હજારોની કિંમતમાં વેચાય છે.

વડોદરા શહેરમાં છેલ્લા બે વર્ષથી આવી અનેક ચોરીના ગુન્હા નોંધાયા હતા. ખાસ કરીને ગોરવા,ગોત્રી,લક્ષ્મીપુરા, ફતેગંજ સહિતન પોલીસ મથક વિસ્તારમાં આવી ચોરીઓ નોંધાતી હતી. જે અંગે પોલીસે તપાસ હાથ ધરી હતી.

ક્રાઇમ બ્રાન્ચે ચોરી થયાના સ્થળ પર અને આસપાસના CCTV તપાસતા બાતમી મળી હતી કે આ સાયલેન્સર ચોરી કરતી ગેંગ એક ખાસ વિસ્તાર માંજ સક્રિય છે. જ્યાં વોચ ગોઠવતા રીક્ષા નંબર GJ06 YY 7865ને રોકીને તપાસતા તેમાં ચોરીના સાયલેન્સર મળી આવ્યા હતા. રીક્ષા ચાલક અનિલ ડાભી ની પૂછપરછ કરતા સમગ્ર સાયલેન્સર ચોરીનો ભેદ ઉકેલાયો હતો.

ગોરવા સમતા વિસ્તારમાં રહેતો અનિલ ડાભી વિવિધ વિસ્તારમાં પાર્ક કરેલી ઇક્કો કારના સાયલેન્સર ચોરી કરવા માટે રાત્રીના સમયે નીકળતો હતો અને આ ચોરીના સાયલેન્સર નવાયાર્ડ રોડ પર આવેલા સીરાજ નામના ગેરેજ સંચાલક તેમજ આણંદના ભાલેજ રોડ પર સલીમ ગુલામનબી વોહરા ને આપતો હોવાની કબૂલાત કરી હતી. આ સાયલેન્સર ને કાપી અને તેમાંથી નીકળતી માટી ના 5000 રૂપિયા મળતા હતા. જોકે તેની અસલ કિંમત 50,000 થી પણ વધુ હતું.

પોલીસે કારના સાયલેન્સર ચોરતી ટોળકીને ઝડપી પાડીને છેલ્લા બે વર્ષમાં વડોદરા શહેરના ગોરવા, ગોત્રી, લક્ષ્મીપુરા, છાણી તેમજ ફતેગંજના મળીને 32 જેટલા ગુન્હાઓનો ભેદ ઉકેલ્યો હતો.