• કોંગ્રેસનું એક જૂથ અગોરાના કથિત દબાણ મુદ્દે મ્યુનીસીપલ કમિશ્નરને રજૂઆત કરવા પહોચ્યું, અમી રાવતની સૂચક ગેરહાજરી
• ખુબ ગાજેલા અમી રાવત કેમ અગોરાના વિષયમાં હાજર નથી તે પ્રશ્ન પર સૌની ચુપકીદી
• દિવાળી પહેલાની એ સામાન્ય સભામાં ફ્લોર પર બેસી ગયેલા અમી રાવતે અગોરાના વિષયમાં એકાએક કેમ હાથ ખંખેર્યા ?

વડોદરા શહેરના મંગલપાંડે રોડ પર આવેલા બાલાજી ઇન્ફ્રાસ્ટ્રકચરના અગોરા મોલના માલિકો દ્વારા વિશ્વામિત્રી નદીમાં પુરાણ કરીને વધારાની જમીન પર કબજો કરી લેવાના કિસ્સામાં આજે પૂર્વ વિપક્ષીનેતા ચંદ્રકાંત ભથ્થુંની આગેવાનીમાં મ્યુનીસીપલ કમિશ્નરને આવેદનપત્ર આપવામાં આવ્યું હતું જેમાં વિશ્વામિત્રી બચાવો સમિતિના શૈલેશ અમીન સહીત કોંગ્રેસના કેટલાક નગરસેવકો પણ જોડાયા હતા. જોકે છાશવારે અગોરા મામલે પાલિકાની સભામાં ફ્લોર પર બેસી જતા વિપક્ષી નેતા અમી રાવતની  સૂચક ગેરહાજરી આંખે ઉડીને વળગી હતી.

વડોદરામાં પબ્લિક પ્રાઈવેટ પાર્ટનરશીપમાં થયેલા લગભગ તમામ પ્રોજેક્ટમાં તત્કાલીન શહેર કોંગ્રેસ પ્રમુખ અને હાલના કોંગ્રેસના નેતા નરેન્દ્ર રાવતને વાંધો હતો. અને આવા બાંધકામો સામે અંદોલન પણ કર્યા હતા. હાલના વિપક્ષના નેતા અને જાણીતા પર્યાવરણવિદ અમી રાવતે પણ વરસાદી કાંસ પરના દબાણો, યુનીવર્સીટીની જમીન પર ગેરકાયદે બાંધકામ,વિશ્વામિત્રીના વહેણમાં ફેરબદલ કરીને કરવામાં આવેલા દબાણો જેવા વાક્યો સાથે કરેલા આંદોલનમાં આજે પણ એ બાંધકામો ઠેર ના ઠેર કેમ છે તે સમજાતું નથી .

દિવાળી પહેલા આવી જ એક ઘટનામાં  નાટ્યાત્મક રીતે મંગલપાંડે રોડ પર પાંચ વર્ષથી ગાજેલા અગોરા મોલનો મુદ્દો એકાએક શાંત  કરી દેવામાં આવ્યો, ઉજવણી કરવામાં આવી કે અમી રાવતની લડાઈમાં જીત થઇ છે. શહેરીજનોને 400 કરોડ ઉપરાંતનો ફાયદો થયા ની ખુશી પણ વ્યક્ત કરી દેવાઈ, મેયરે પણ હોશે હોશે કહી દીધું કે અગોરા દ્વારા દબાણ કરવામાં આવેલી વધુ પડતી જમીન પર કમ્પાઉન્ડ વોલ બનાવી દેવાશે. દિવાળી પહેલાના આ નાટકોની આજે પોલ ખુલી જવા પામી છે.

દિવાળી બાદ  લાંબો સમય વીતી ગયો, પણ “અદબ પલાઠી મોઢે આંગળી” કરીને બેઠેલા વિપક્ષી નેતાને કેમ અગોરાના દબાણની દીવાલ યાદ આવતી નથી ?  પાલિકાના સભાગૃહના રંગમંચ પર ભજવાયેલા સ્ક્રિપ્ટેડ નાટક બાબતે મેયર પણ કાંઈજ પ્રતિકિયા આપતા  નથી .

અગોરા પર જાગનારા પત્રકારો પણ ચુપ થઇ ગયા,વિશ્વામિત્રી પરના દબાણોનો મુદ્દો પણ સાઈડ ટ્રેક થઇ ગયો અને કમ્પાઉન્ડ વોલમાં ખુશ થયેલા નેતાઓ પણ આજે ખોવાઈ ગયા,આજે ફરી અગોરાના દબાણો દુર કરવાની માંગણી સાથે એક મોરચો પાલિકાના દાદરે આવી પહોચ્યો..

પૂર્વ વિપક્ષી નેતા ચંદ્રકાંત ભથ્થું, કોંગી નગરસેવક બાળુ સુર્વે , સીનીયર નગર સેવક પુષ્પાબેન વાઘેલા, ધારાશાસ્ત્રી અને ખરેખરના પર્યાવરણવિદ એવા વિશ્વામિત્રી બચાવો સમિતિના શૈલેશ અમીન સહિતના આગેવાનો એ મ્યુનીસીપલ કમિશ્નરને આવેદનપત્ર આપ્યું,માત્ર કમ્પાઉન્ડ વોલ બનાવવા નહિ વિશ્વામિત્રી નદીના વહેં પર બાંધવામાં આવેલા દબાણો દુર કરવાની માંગણી સાથેનું આવેદનપત્ર આપવામાં આવ્યું