મધ્યરાત્રીએ શહેરને પોતાના પિતાની જાગીર સમજીને શરાબના નશામાં ધુત્ત થયેલા કેટલાક ખાનદાની નબીરાઓ શહેરના રાજમાર્ગો પર કરતબો કરતા હોય છે. જ્યારે આવા નબીરાઓ અનેક વાર કેટલાક માસૂમ રાહદારીઓ અને ફૂટપાથ પર સુતા શ્રમજીવીઓ ને અડફેટે લે છે. અને કેટલાક કિસ્સામાં રાહદારીઓને જીવ ગુમાવવાનો વારો આવે છે.

શરાબના નશામાં ધુત્ત આવા નબીરાઓ કોઈ પણ બીક વિના શહેરના માર્ગોને રેસિંગ ટ્રેક બનાવીને વાહનો હંકારે છે. અને અકસ્માત સર્જે છે. ગત રાત્રે એક નબીરાએ સયાજીગંજ પોલીસ મથક પાસે ઉભેલી પોલીસ વાન સહિત મોટર સાયકલ સાથે અનેક વાહનો સાથે અકસ્માત સર્જ્યો હતો. સદનસીબે આ અકસ્માતમાં કોઈ પોલીસ જવાનને ઇજા પહોંચી નથી. જોકે શહેર પોલીસની કડક નાઈટ પેટ્રોલિંગમાં પણ નબીરાઓ છેક પોલીસ મથક પાસે ઉભેલી પોલીસ જીપ સાથે અકસ્માત સર્જી જાય ત્યારે સમજમાં આવે કે રાત્રીના સમયે તો શહેરમાં શારાબીઓ અને નબીરાઓનું જ રાજ ચાલે છે.

સયાજીગંજ પોલીસ મથકમાં ફરજ બજાવતા ASI જયંતીભાઈએ નોંધાવેલી ફરિયાદ પ્રમાણે ગત રાત્રીને 2.45 કલાકે ટોયોટા ઇટીઓસ કાર લઈને બ્રિજેશ જયંતિભાઈ પરમાર રહે.18 ગાર્ડન પાર્ક સોસાયટી રહે. દિવાળીપુરા જુના પાદરા રોડ, પોતાની ગાડી ગફલત ભરી રીતે ચલાવીને પોલીસ સ્ટેશન પાસે ઉભેલી SHE ટીમની જીપ તેમજ એક પોલીસ મીની બસને અસફેટે લઈને ભારે નુકશાન પહોચાડ્યું હતું. તાપસ કરતા જાણવા મળ્યું કે ટોયોટા કારનો ચાલક બ્રિજેશ પરમાર ચિક્કાર નશાની હાલતમાં ધુત્ત થઈને કાર હંકારતો હતો જ્યારે સ્ટેયરિંગ પરથી કાબુ ગુમાવતા પોલીસ મથક પાસે ઉભેલી પોલીસ વાન ને અડફેટે લઈ લીધી હતી.

પોલીસે નશામાં ધુત્ત નબીરા બ્રિજેશ પરમારની ધરપકડ કરી કાર તેમજ મોબાઈલ ફોન મળીને 3.35 લાખનો મુદ્દામાલ જપ્ત કર્યો છે.