• સન ફાર્મા રોડ વિનાયક હાઉસિંગ સોસાયટી નજીક વહેલી સવારે બની ઘટના
• શ્વાન સાથે જોગીંગ પર નીકળેલા નાગરિક પણ ખાનગી બસની અડફેટે આવતા રહી ગયા
• અંતરિયાળ માર્ગ પર પુરપાટ દોડતી ખાનગી ટ્રાવેલ્સના બસ ચાલક પર કાર્યવાહી કરવાને બદલે પોલીસે સમાધાનની સલાહ આપી

વડોદરા શહેરના અટલાદરા સનફાર્મા રોડ ઉપર આવેલા વિનાયક હાઉસિંગ નજીક આજે વહેલી સવારે એક પૂરપાટ દોડતી ખાનગી ટ્રાવેલ્સની બસ દ્વારા સ્થાનિક રહીશના પાલતું શ્વાનને અડફેટે લઇ મોત નિપજાવ્યું હતું. અકસ્માત સર્જીને બસચાલક ત્યાંથી ફરાર થઈ ગયો હતો ઘટના અંગે શ્વાન માલિક દ્વારા પોલીસને જાણ કરાતા પોલીસે ઘટનાસ્થળે આવી ફરિયાદ નોંધવાને બદલે શ્વાન માલિકને ટ્રાવેલ્સના સંચાલક સાથે સમાધાન કરી લેવાની સલાહ આપી હતી જેને લઇને સ્થાનિક રહીશોમાં રોષની લાગણી જોવા મળી હતી.

વડોદરા શહેરના અટલાદરા સનફાર્મા રોડ ઉપર આવેલા વિનાયક હાઉસિંગ સોસાયટી નજીક મુખ્ય માર્ગ ઉપર આજે વહેલી સવારે વિશાલ પંડિત નામના વ્યક્તિ જોગીંગ માટે પોતાના શ્વાનને લઈને રસ્તા પર જઇ રહ્યા હતા. તે દરમિયાન પુરપાટ ઝડપે આવેલી પટેલ ટ્રાવેલ્સની બસ દ્વારા પાળતુ શ્વાનને હડફેટે લીધો હતો જ્યારે બસની અડફેટે આવતા આવતા વિશાલ પંડિત પણ બચી ગયા હતા ઘટનાની ગંભીરતાને જોઈ વિશાલ પંડિતે જે.પી.રોડ પોલીસ મથકનો સંપર્ક કર્યો હતો અને બસચાલક વિરુદ્ધ ફરિયાદ નોંધવાની માંગણી કરી હતી.

પોલીસે ઘટનાની ફરિયાદ નોંધવાને બદલે ફરિયાદી વિશાલ પંડિતને પટેલ ટ્રાવેલ્સના સંચાલક સાથે સમાધાન કરી લેવાની સલાહ આપી હતી સ્થળ પર આવેલા પોલીસ જવાને જણાવ્યું હતું કે “કેસ કરશો તો ચાર-પાંચ વર્ષનો સમય નીકળી જશે તેના બદલે તમે ટ્રાવેલ્સના સંચાલક સાથે સમાધાન કરી લો” પોલીસની આ વાત સાંભળીને સ્થાનિક રહીશો અચંબિત થઈ ગયા હતા વારંવાર આ માર્ગ ઉપર ટ્રાવેલ્સ સંચાલકો દ્વારા પૂરપાટ રીતે વાહનો હંકારવામાં આવે છે

ઘણીવાર ફરિયાદો કરી છતાય તેનો કોઈ નિકાલ આવતો નથી જ્યારે આજે એક મુંગા જાનવરનો જીવ ગયો છે ત્યારે પોલીસ દ્વારા સમાધાન કરી લેવાની સલાહ આપવામાં આવી રહી છે. શું કોઈ નાગરિક પોતાનો જીવ ગુમાવે તો પણ પોલીસ કર્મચારી સમાધાન કરી લેવાની સલાહ આપશે કે કેમ તે સવાલ ઊભો થાય છે,મૂંગા પશુઓના જીવની કિંમત કેટલી? એ વડોદરા શહેરના આ પોલીસ કર્મચારીઓના નિવેદન થી જાણી શકાય છે.