• નાઈટ શેલટરનું લોકાર્પણ પણ થઈ ગયું ,છતાંય શ્રમજીવી અને નિરાધારો માટે ખુલ્લું મુકાયું નથી
• સુપ્રીમ કોર્ટના આદેશ બાદ8 જેટલા સ્થળે 9 કરોડના ખર્ચે રેનબસેરા બનાવ્યા પણ કોઈ ગરીબને પેસવા પણ નથી દેવાતો
• શું પાલિકાના સત્તાધીશો અને અધિકારીઓની માનવતા મરી પરવારી?

એક તરફ સી.આર.પાટીલ ના આદેશ બાદ વડોદરા ને ભિક્ષુક મુક્ત નગરી બનાવવાની વાતો થઈ રહી છે તો બીજી તરફ કરોડો ના ખર્ચે બનેલા રેન બસેરા ધૂળ ખાઈ રહ્યા છે.રેન બસેરા બનાવ્યા તો ખરા પણ તેને ખુલ્લા મુકવામાં આવ્યા નથી. અધિકૃત રીતે લોકાર્પણ થઈ ગયું તેમ છતાંય પાલિકા હાલ તેનો ઉપયોગ સાર્વજનિક કરતી નથી.

વડોદરા મહાનગરમાં રાખડતું જીવન વિતાવતા અને શ્રમજીવીઓ માટે સુપ્રીમ કોર્ટના આદેશ બાદ અદ્યતન સુવિધા સાથેના રેન બસેરા તૈયાર કરવામાં આવ્યા છે. 8 જેટલા સ્થળોએ 9 કરોડથી વધુને ખર્ચે ઉભા કરાયેલા નાઈટ શેલટર હાલની કડકડતી ઠંડીમાં પણ ખુલ્લા મુકવામાં આવ્યા નથી. નિરાધાર લોકો રસ્તાના કિનારે ફૂટપાથ પર સુઈ ને રાત વિતાવે છે ત્યારે અદ્યતન સુવિધા સાથે ઉભા કરેલા શેલટરનો ઉપયોગ કરવા દેવામાં આવતો નથી.

શહેરના લાલબાગ બ્રિજ નીચે બનાવેલા શેલટરનું ઉદ્ઘાટન થયે પણ 4 મહિનાનો સમય વીતી ગયો છતાંય નિરાધાર શ્રમજીવીઓ માટે તે બિન ઉપયોગી છે. નાઈટ શેલટર પર સિક્યુરીટી ગાર્ડ મૂકી દેવામાં આવ્યો છે. પણ તેને ઉપયોગ માટે ખુલ્લું મુકવામાં આવતું નથી. નાઈટ શેલટરની બહાર જ શ્રમજીવીઓ કાચાં ઝૂંપડામાં રહે છે. પણ આવી કડકડતી ઠંડીમાં રાત વિતાવવા માટે તેઓને છત આપવાને બદલે તેઓને ત્યાંથી ખસેડવાની ફિરાકમાં પાલિકાના આધિકારીઓ છે.

લાલબાગ બ્રિજ નીચે રહેતા શ્રમજીવીઓ ને એટલા માટે ત્યાંથી ખસી જવા માટે કહેવાઇ રહ્યું છે કારણકે આ જગ્યાને પે એન્ડ પાર્ક માટે ઇજારદાર ને સોંપવાનો હિલચાલ પાલિકા દ્વારા ચાલી રહી છે. સંવેદનહીન પાલિકાના અધિકારીઓ કરોડોના ખર્ચે ગરીબ-નિરાધારના હીત માટે કરોડો તો ખર્ચે છે પણ તેઓને સુવિધાનો ઉપયોગ કરવા દેવામાં આવતો નથી.

ભાજપ પ્રમુખ સી.આર.પાટીલ ના આદેશ બાદ વડોદરા ના મેયર દ્વારા વડોદરા ને ભિક્ષુક મુક્ત નગરી બનાવવાની જાહેરાત કરાઈ હતી અને કામગીરી કરતા તમામ ભિક્ષુકોને વારસિયા સ્થિત એક માત્ર ભિક્ષુક સ્વીકાર કેન્દ્ર ખાતે રાખવામાં આવી રહ્યા છે.તો સુપ્રીમ કોર્ટના આદેશ બાદ જાગેલા તંત્રએ શહેરના 8 જેટલા સ્થળોએ 9 કરોડ થી વધુ ના ખર્ચે બનેલ રેનબસેરા ઉદ્ઘાટન બાદ પણ ધૂળ ખાઈ રહ્યા છે.4 માસ અગાઉ જ લાલબાગ બ્રિજ નીચે 1.71 કરોડના ખર્ચે બનેલ નાઈટ શેલટર ના પણ આવા જ હાલ છે.

ઉલ્લેખનિય છે કે સી.આર.પાટીલે કોઈ ભિક્ષુક કે શ્રમજીવી ફૂટપાથ પર દેખાવો ન જોઈએ તે મામલે તમામ મહાનગર ના સત્તાધીશો ને આદેશ કર્યા છે પરંતુ પેપર પર વિકાસ બતાવી એવોર્ડ મેળવતા સત્તાધીશો પણ આ મામલે પોતાની પ્રતિક્રિયા મામલે સામાજિક કાર્યક્રમ માં વ્યસ્ત હોવાનું જણાવી હાથ ખંખેરી રહ્યા છે.