• કેટલાક હોદ્દેદારોને ખોટી માહિતી આપી મિટિંગમાં બોલાવ્યા
• ધારાસભ્યની ગેરહાજરીમાં એક વ્યક્તિ માટેની લોબિંગના પ્રયત્નો જોઈ ભાજપના હોદ્દેદારો પણ ચોંકી ઉઠ્યા!
• વાઘોડિયામાં ધારાસભ્યએ કરેલા કામો અંગે કેન્દ્રીય મંત્રીએ માહિતી લીધી
• એક વ્યક્તિને કેન્દ્રિત કરીને કરવામાં અસવેલી સેન્સ પ્રક્રિયાની જીલ્લા ભાજપમાં ચર્ચા

વડોદરા જીલ્લાની ચર્ચાસ્પદ રહેલી વાઘોડિયા બેઠક પર ભાજપના દાવેદારોની હારમાળા સર્જાઈ છે. કુલ 27 જેટલા દાવેદારોએ ઉમેદવારી માંગ્યા બાદ કેન્દ્રીય પાર્લામેન્ટરી બોર્ડના સદસ્ય અને કેન્દ્રીય મંત્રી પુરષોતમ રૂપાલાને વાઘોડિયા બેઠક પર શું ચાલી રહ્યું છે તેની ગ્રાઉન્ડ રિયાલિટી જાણવા માટે આજે વડોદરા આવ્યા હતા. અને હાઇવે પર પદમલા પાસેના એક ખાનગી ફાર્મમાં વાઘોડિયા બેઠક અંગે ચર્ચા કરવા કેટલાક અપેક્ષિતોને બોલાબીને સાંભળવામાં આવ્યા હતા.

વાઘોડિયા વિધાનસભામાં ભાજપના 7 ટર્મથી ધારાસભ્ય રહેલા મધુ શ્રીવાસ્તવ અને સંગઠન અને અન્ય ચૂંટાયેલા પ્રતિનિધિઓના અભિપ્રાયો જાણવા માટે આજે ગુપ્ત રાહે બેઠક યોજાઈ હતી. આ બેઠક એટલી ગુપ્ત હતી કે અપેક્ષિતો ફાર્મ પર પહોંચ્યા ત્યાં સુધી તેઓને કોઈ વિષયની માહિતી આપવામાં આવી ન હતી. અગાઉ થયેલી કોન્સેસ પ્રક્રિયામાં વડોદરા સાંસદ રંજનબેન ભટ્ટ ગેરહાજર હતા જેથી આજે તેઓ પણ મિટિંગમાં હાજર રહ્યા હતા.

સામાન્ય રીતે વાઘોડિયા વિધાનસભાની ઝીણવટ ભરી માહિતી મેળવવી હોય તો દાવેદારો સિવાયના કાર્યકરો કે હોદ્દેદારોને સાંભળવા જોઈએ, જોકે અહીં તો જીલ્લા ભાજપ પ્રમુખથી લઈને જીલ્લા પંચાયતના સભ્યો પોતે દાવેદાર હોવા છતાંય વાઘોડિયા વિધાનસભામાં મધુ શ્રીવાસ્તવના રિપોર્ટ કાર્ડની માહિતી આપવા પહોંચ્યા હતા. જ્યાં એક લાડકવાયા દાવેદારની ખાસ લોબિંગ ચર્ચામાં છે.

સાત ટર્મથી ધારાસભ્ય મધુ શ્રીવાસ્તવ કે કેમ રિપ્લેસ કરવા જોઈએ તેવા પ્રશ્નોમાં જીલ્લા સંગઠન અને ચૂંટાયેલા નેતાઓએ પોતાના અભિપ્રાયો કેન્દ્રીય મંત્રી સમક્ષ મુક્યા હતા. જોકે અભિપ્રાયો રજૂ કરનાર મોટા ભાગના હોદ્દેદારો આ વિધાનસભા બેઠક પર નજર માંડીને બેઠા હોય ત્યારે તેઓની રજૂઆતો કેટલી સાચી અને સ્પષ્ટ હોઈ શકે એ સામાન્ય રીતે સમજી શકાય છે.

જોકે આધારભૂત માહિતીના આધારે કેન્દ્રીય મંત્રીએ ફક્ત ધારાસભ્યએ કરેલા કામો અંગે માહિતી મેળવી છે. જ્યારે એક ખાસ દાવેદારની કરવામાં આવતી લોબિંગ અંગે પણ નોંધ લીધી છે!