વડોદરા શહેરમાં માથાભારે તત્વોનો આતંક વધી રહ્યો છે. સામી ચૂંટણીએ જ્યારે માથાભારે તત્વોને જેલના સળિયા પાછળ ધકેલવાના હોય ત્યારે ગંભીર ગુન્હામાં સંડોવાયેલા તત્વો શહેરમાં આતંક મચાવી રહ્યા છે. શહેરના ખોડિયાર નગર વી.આઈ.પી રોડ પર એક પરિવારને મધ્યરાત્રીએ જગાડીને માત્ર 12 હજાર રૂપિયાની ઉઘરાણી માટે જીવલેણ હુમલો કરી ઢોર માર મારવામાં આવ્યો હોવાનો વિડીયો સામે આવ્યો છે. જ્યારે પોલીસ કંટ્રોલ રૂમમાં જાણ કર્યા બાદ પોલીસે હુમલાખોરોની ઓળખ કરી તેઓ વિરુદ્ધ ગુન્હો નોંધવામાં આવ્યો છે.

વડોદરા શહેરના ન્યુ વીઆઇપી રોડ ખોડિયાર નગર વિભાગ 1 માં રહેતા મગનભાઈ નાથાભાઇ સોલંકી 10 નવેમ્બરના રાત્રે પોતાના ઘરે પત્ની અને દીકરી સાથે ઘરમાં સુઈ ગયા હતા ત્યારે રાત્રીના ત્રણેક વાગે કોઈએ દરવાજો ખખડાવ્યો હતો. દરવાજા પર મહર્ષિ બ્રહ્મભટ્ટ જે મગનભાઈના દીકરા નીરવનો મિત્ર હોવાથી તેઓએ દરવાજો ખોલ્યો હતો. નીરવ સાથે અન્ય બે ત્રણ યુવકો હતા જેઓ જોર જોર થી અપશબ્દો બોલવાનું શરૂ કરી દીધું હતું અને રૂપિયાની ઉઘરાણી કરી મગનભાઈને જમણી આંખ અને દાઢી તેમજ પેટના ભાગે કોઈ હથિયાર વડે મુક્કા મારવાનું શરૂ કરી દીધું હતું.

પતિને માર મારતા જોઈએને મગનભાઈની પત્ની તેમને બચાવવા આગળ આવતા એક યુવકે વૃદ્ધ પત્નીને જોરથી લાફો મારીને જમીન ઓર ઢાળી દીધી હતી. જે બાદ ઘરમાં પ્રવેશીને દીકરીની સામે જ પિતાને માર માર્યો હતો. ઘટનામાં આસપાસના રહેવાસીઓ બહાર આવી જતા તેઓએ સમગ્ર ઘટનાનો વિડીયો મોબાઈલમાં કંડારી લીધો હતો.

હુમલાખોરો વૃદ્ધ દંપતીને માર મારી ચાલ્યા ગયા હતા જે બાદ પુત્ર નીરવ ઘરે આવતા વીડિયોમાં દેખાતા ઇસમની ઓળખ કરી હતી. આજે પોલીસ કંટ્રોલ રૂમમાં જાણ કરી હુમલાખોરો વિરુદ્ધ ગુન્હો નોંધવાની તજવીજ શરૂ કરી હતી. મગનભાઇએ કિશનવાડીના માથાભારે શખ્સ સૂરજ ઉર્ફે ચુઈ કહાર સહિત અન્ય વ્યક્તિઓ સામે ગુન્હો નોંધાવ્યો છે.સૂરજ ઉર્ફે ચુઈ કહાર અગાઉ વાઘોડિયા રોડ પર સામાન્ય અકસ્માતના કિસ્સામાં યુવકને મોતને ઘાટ ઉતારી ચુક્યો છે. હત્યાના કેસમાં પકડાયેલો સૂરજ જ્યારે જેલ માંથી છૂટ્યો ત્યારે તેના સમર્થકોએ રેલી કાઢી હતી. જ્યારે વિસ્તારમાં પોતાનો ખૌફ જાળવી રાખવા અવારનવાર નાગરિકોને ધમકાવવામાં તેને ફાવટ આવી ગઈ છે. આવા માથાભારે તત્વોની શાન ઠેકાણે લાવવાની જવાબદારી પોલીસની છે જોકે પોલીસ પણ આવા તત્વોને છાવરતી હોય તેમ લાગી રહ્યું છે.