• જો ભાજપ ટીકીટ ન આપે તો અપક્ષ લડવાનું વિચારનારા નેતાઓ મતોના ધ્રુવીકરણને અટકાવી કોંગ્રેસનો હાથ પકડશે!
• કોઈ એક વ્યક્તિ પ્રત્યે પક્ષનો એકતરફી ઝુકાવ જીલ્લાની બેઠકો ગુમાવવાનું જોખમ વધારશે
• વડોદરા જીલ્લાની ચાર બેઠકો પર ત્રીપાંખિયા જંગના એંધાણ વચ્ચે ઉમેદવારો માટે નવો માર્ગ ખુલ્યો

(મૌલિક પટેલ) હજી તો વિધાનસભાની ચૂંટણી જાહેર નથી થઇ ત્યાં તો વડોદરા જીલ્લામાં ચૂંટણીને લઈને દાવેદારો અને સંભવિત ઉમેદવારો સહિત ચાલુ ધારાસભ્યો વચ્ચે ખેંચતાણ શરૂ થઈ ગઈ છે. જ્યાં આજે સાવલી બેઠક પર કેતન ઇનામદાર સામે ચૂંટણી લડવા ભાજપ પાસેથી ઉમેદવારી માંગતા કુલદીપસિંહ રાઉલજીએ કોંગ્રેસનો ખેસ ધારણ કરી આરપારની લડાઈની તૈયારી કરી લીધી છે. આ અગાઉ કોંગ્રેસ અને ભાજપ વચ્ચેની લડાઈમાં અપક્ષ ઉમેદવારી કરે તો કુલદીપસિંહની જીતની શક્યતા ત્રીજા ક્રમાંકે હતી. જે હવે કોંગ્રેસમાં શામેલ થવાની સાથે જ જીવની શક્યતા બીજા ક્રમાંકે આવી ગઈ છે. જ્યારે કેતન ઇનામદારનો એક લાખ થી વધુ મત થી જીત મેળવવાનું સપનું પણ સપનું જ રહી જશે તેમ લાગી રહ્યું છે.

સાવલીમાં વર્ષ 2017માં વિધાનસભાની ચૂંટણી દરમિયાન કોંગ્રેસમાં ત્રણ દિગ્ગજો વચ્ચે પડેલા ભાગલાનો ફાયદો કેતન ઇનામદારને મળ્યો હતો. જ્યાં કેતન ઇનામદારને 97,646 વોટ મળ્યાં હતાં. જ્યારે કોંગ્રેસના ઉમેદવાર સાગર બ્રહ્મભટ્ટને 56013 વોટ મળ્યાં હતાં. જ્યારે કોંગ્રેસના પૂર્વ ધારાસભ્ય ખુમાનસિંહ ચૌહાણ NCPના ચિન્હ સાથે ચૂંટણી લડીને ત્રીજા ક્રમાંકે 4060 મત મેળવ્યા હતા. લગભગ 77 ટકા વોટિંગમાં કેતન ઇનામદારને 41000 મતોની લીડ મળી હતી.

વર્ષ 2017 અને વર્ષ 2022ની ચૂંટણીમાં તમામ સમીકરણો બદલાયા છે. આ વર્ષે ચૂંટણીમાં સાવલી બેઠક પર ભાજપ સાથે જોડાયેલા અને ભાજપના ધારાસભ્યથી નારાજ જૂથ વચ્ચે સીધી લડાઈ છે. જ્યારે 68 ટકા ક્ષત્રિય મત ધરાવતા તાલુકામાં ક્ષત્રિય ઉમેદવારની માંગણી વચ્ચે કુલદીપસિંહ રાઉલજીનું કોંગ્રેસમાં જોડાવવુ એ અનેક શક્યતાઓને જન્મ આપે છે.

આ તો થઈ ફકત સાવલીની વાત,પણ સાવલી જેવી સ્થિતિ જિલ્લાની અન્ય ત્રણ બેઠક વાઘોડિયા,પાદરા અને કરજણમાં સર્જાઈ છે. જ્યાં ભાજપ vs ભાજપના ચિત્રો અત્યારથી જોવા મળી રહ્યા છે. પાદરાને બાકાત કરીએ તો કરજણ અને વાઘોડિયામાં કોંગ્રેસને ઉમેદવાર મળવો પણ અઘરો છે. ત્યારે ભાજપની આંતરિક લડાઇમાં કોંગ્રેસને તેનો સીધો ફાયદો મળે તેમ છે.

જો ભાજપના મતબેંકમાં ભાગલા પડે તો તેનો સીધો ફાયદો કોંગ્રેસ કે અન્ય પક્ષને થઇ શકે છે. મતોના ધ્રુવીકરણની ભાજપની નીતિ ભાજપ પર જ ભારે પડી શકે છે. કેટલી વિધાનસભામાં ભાજપના ચાલુ ધારાસભ્યો સી.આર પાટીલની પેજ કમિટીની ફોર્મ્યુલામાં પોતાના ગામમાં પણ કમિટી બનાવવામાં અસફળ થયા છે ત્યારે ભાજપના હોદ્દેદારો અને પ્રદેશના નેતાઓ માટે વડોદરા જીલ્લાની અન્ય ત્રણ વિધાનસભા બેઠક માટે ઉમેદવારની પસંદગી અઘરી થઈ પડે છે.