ફાયર બ્રિગેડ દ્વારા મકાનમાં ફેસાયેલા વૃધ્ધ દંપતિ સહિત ચારને બચાવ્યા

વડોદરાના યાકુતપુરા પટેલ ફળિયામાં વહેલી સવારે જર્જરીત બે મજલી મકાનનો પ્રથમ માળનો ભાગ ધરાશયી થયો હતો. ધડાકા સાથે મકાનનો પ્રથમ માળ ધરાશયી થતાં, નિંદ્રાધિન વૃદ્ધ દંપતિ સહિત ચાર વ્યક્તિઓ ફસાઇ ગયા હતા. આ બનાવની જાણ ફાયર બ્રિગેડને કરવામાં આવતા લાશ્કરો દોડી આવ્યા હતા. અને મકાનમાં ફસાઇ ગયેલા ચાર વ્યક્તિઓને સહિસલામત બહાર કાઢ્યા હતા. આ ઘટનામાં ચાર પૈકી ત્રણને સામાન્ય ઇજાઓ પહોંચી હતી. ઇજાગ્રસ્તોને સયાજી હોસ્પિટલમાં ખસેડવામાં આવ્યા હતા.

મળેલી માહિતી પ્રમાણે યાકુતપુરા પટેલ ફળિયામાં જર્જરીત બે મજલી મકાન આવેલું છે. મકાનના પ્રથમ માળે મુસ્તાકભાઇ રંગરેજ (ઉં.75), સુબરાબીબી મુસ્તાકભાઇ રંગરેજ (ઉં.70), અનાસ ઇમરાનભાઇ રંગરેજ (ઉં.19) અને ઇશુભાઇ રંગરેજ રહે છે. વહેલી પરિવાર નિંદ્રાધિન હતું. દરમિયાન સવારે 5 વાગ્યાના સુમારે તેમનું મકાન ધરાશયી થઇ ગયું હતું. મકાન ધરાશયી થવાનો અવાજ આવતા નિંદ્રાધિન રંગરેજ પરિવાર પથારીમાંથી ઉભા થઇ ગયા હતા. બીજી બાજુ ગ્રાઉન્ડ ફ્લોરમાં રહેતું પરિવાર તેમજ પટેલ ફળિયાના લોકો પણ જોરદાર અવાજ સાંભળી પથારીમાંથી ઉભા થઇ ગયા હતા.

વહેલી સવારે પાંચ વાગે મકાન ધરાશયી થતાં, લોકોના ટોળા એકઠા થઇ ગયા હતા. સ્થાનિક લોકોએ પ્રથમ માળે ફસાયેલા રંગરેજ પરિવારને બહાર કાઢવા માટે પ્રયાસ પણ કર્યો હતો. પરંતુ, શક્ય બન્યું ન હતું. દરમિયાન આ બનાવ અંગેની જાણ ફાયર બ્રિગેડને કરવામાં આવતા લાશ્કરો દોડી આવ્યા હતા. અને મકાનમાં ફસાયેલા વૃધ્ધ દંપતિ મુસ્તાકભાઇ રંગરેજ તેમની પત્ની સુબરાબીબી સહિત ચારને સહીસલામ બહાર કાઢ્યા હતા. અને સામાન્ય ઇજા પામેલા વૃધ્ધ દંપતિ સહિત ત્રણને સયાજી હોસ્પિટલમાં મોકલી આપ્યા હતા.

ફાયર બ્રિગેડના લાશ્કરોના જણાવ્યા પ્રમાણે વહેલી સવારે બનેલી આ ઘટનામાં મુસ્તાકભાઇને માથામાં, મુસ્તાકબીબીને હાથમાં અને અન્ય એકને પગમાં ઇજા પહોંચી હતી. વહેલી સવારે બનેલા આ બનાવે વિસ્તારમાં ચકચાર જગાવી મુકી હતી. નોંધનીય છે કે, વડોદરા શહેરમાં મોટી સંખ્યામાં જર્જરીત મકાનો છે. અનેક મકાનોને મકાનો ઇતારી લેવા માટે પણ અવાર-નવાર સુચનાઓ આપવામાં આવી છે. પરંતુ, મકાન માલિકો દ્વારા ગંભીરતા લેવામાં આવતી નથી.