• વડોદરા ગ્રામ્યમાં આવેલ ખાનપુર કિ-સ્ટોન મેન્શનમાં તસ્કરો દ્વારા ખુલ્લેઆમ ચોરી અને લૂંટફાટ ઘટનાઓ
• એક સપ્તાહમાં ચાર વિલાના તાળા તોડી તસ્કરો લાખોની ચોરી કરી પલાયન
• તસ્કરો હથિયારો સાથે સોસાયટીમાં પ્રવેશી કોઈ પણ મકાનને નિશાન બનાવી ચોરી કરી પલાયન થાય છે.
• ચોરીની ઘટના સોસાયટીના CCTVમાં કેદ,છતાંય પોલીસ કાર્યવાહી શૂન્ય!
• ભય ના ઓથા હેઠળ જીવતા સોસાયટીના રહીશોએ જીલ્લા SPને રજુઆત કરી

વડોદરા શહેરના શેરખી ખાનપુર પાસે આવેલા કી-સ્ટોન મેન્શનમાં તસ્કરોએ તરખાટ મચાવ્યો છે. એક સ્થળે જ વારંવાર ચોરી કરતા તસ્કરોને પોલીસનો ડર રહ્યો નથી. સોસાયટીના સિક્યુરિટી ગાર્ડ દ્વારા તાજેતરમાં ફાયરિંગ પણ કરવામાં આવ્યું હતું તેમ છતાંય તસ્કરો વારંવાર અહીં ચોરીને અંજામ આપી રહ્યા છે. આ અંગે સોસાયટીના રહીશોએ જીલ્લા પોલીસ વડાને પણ ફરિયાદ કરી છે. જ્યારે સોસાયટીના રહીશો ભય ના ઓથા હેઠળ જીવી રહ્યા છે.

પ્રાપ્ત માહિતી અનુસાર વડોદરા શહેર નજીક આવેલા શેરખી ખાનપુર ગામે કી- સ્ટોન મેન્શન સોસાયટી આવેલી છે. વૈભવી વિલા ની આ સોસાયટીમાં સિક્યુરિટીની તમામ વ્યવસ્થા છે સોસાયટી કમ્પાઉન્ડ પર જીવંત વીજ વાયરો પણ લગાવવામાં આવ્યા છે. જ્યારે ગનમેન સાથેના સિક્યુરિટી ગાર્ડ અને હોમગાર્ડના જવાનો પણ રાત્રી સુરક્ષામાં તૈનાત હોય છે.

છેલ્લા એક સપ્તાહમાં અહીં ચાર મકાનોમાં તસ્કરોએ હાથફેરો કર્યો છે. ઝાડ પર ચઢીને જીવંત વીજ વાયર ઓળંગીને તસ્કરો મારક હથિયાર સાથે સોસાયટી પરિસરમાં પ્રવેશે છે. અને કોઈ પણ વિલા નું તાળું તોડી અને સોના ચાંદીના દાગીના તેમજ રોકડની ચોરી કરી પલાયન થઈ જાય છે. વિલામાં ભલે રહેતું હોય, તસ્કર ટોળકી તેઓને રૂમમાં બંધ કરીને આખા વિલામાં બિન્દાસ્ત પણે ફરી કિચન માંથી જે મળે એ ખાઈ અને ચોરીનો સામાન લઈને પલાયન થઈ જાય છે.

એક સપ્તાહમાં ચાર મકાનોમાં ચોરી થતા ગત રોજ જ્યારે તસ્કરો ફરી વાર સોસાયટીમાં પ્રવેશ્યા ત્યારે સિક્યુરિટી ગાર્ડે તેઓને ભગાડવા માટે હવામાં ફાયરિંગ પણ કર્યું હતું તેમ છતાંય સ્થાનિક રહીશોમાં ભયનો માહોલ જોવા મળી રહ્યો છે. ગત રોજ તસ્કરોએ ફરી ચોરીનો પ્રયાસ કરતા સોસાયટીના રહીશોએ જીલ્લા પોલીસ વડાને આ અંગે રજુઆત કરી હતી. તસ્કરો થી હવે સ્થાનિક રહીશો જીવ નું જોખમ મહેસુસ કરી રહ્યા છે. આ અંગે તાલુકા પોલીસ મથકે ઓન ફરિયાદ આપી હોવા છતાંય પોલીસ ફક્ત કાચી ફરિયાદ નોંધે છે. જ્યારે વિસ્તારના રહીશોને તસ્કરોથી બચાવવા માટે કોઈ નક્કર પગલાં લેવામાં આવ્યા નથી.