• નવા ચૂંટાયેલા સરપંચ અને તેના સમર્થકોએ પૂર્વ સરપંચના પરિવાર પર હુમલો કર્યો
• યોજનાબદ્ધ થયેલા હુમલા પૂર્વે પોતાના જીવને ખતરો હોવાની અરજી પણ માંજલપુર પોલીસ મથકે કરી હતી.
• પોલીસ મથકમાં અરજી કરી હોવા છતાંય પોલીસ દ્વારા જવાબ લેવા સુદ્ધાની કાર્યવાહી કરાઈ નહીં

વડોદરા તાલુકાના તલસટ ગામે ગ્રામ પંચાયતની ચૂંટણીની અદાવતે બે જૂથ વચ્ચે હિંસક અથડામણ થતા અસંખ્ય લોકો ઇજાગ્રસ્ત થયા હતા. રાત્રીના 12 વાગ્યા બાદ પૂર્વ સરપંચ અને તેમના પરિવારના સભ્યો પર થયેલા હુમલામાં ઘાયલ ગ્રામજનોને સારવાર અર્થે ખાનગી હોસ્પિટલમાં ખસેડવામાં આવ્યા છે. જ્યારે પોલીસે બંને તરફ ગુન્હો નોંધવાની તજવીજ હાથ ધરી છે.

વડોદરા તાલુકાના તલસટ ગામે છેલ્લા 25 વર્ષથી જીતતા આવતા સુખદેવ ઠાકોરને હરાવીને સરપંચ પદે નવનીત ઠાકોરની જીત થઈ હતી.જીત મેળવ્યા બાદ પૂર્વ સરપંચ અને તેમના પરિવારના સભ્યોને વારંવારની ધમકી મળતી હતી. આ અંગે પૂર્વ સરપંચ સુખદેવ ઠાકોર દ્વારા અગાઉ પણ પોતાની જીવનો ખતરો હોવાની અરજી માંજલપુર પોલીસ મથકે કરી હતી.

આજે ગ્રામપંચાયતનો ચાર્જ લેવાનો દિવસ હતો જ્યાં નવા ચૂંટાયેલા સરપંચ અને સભ્યોએ પંચાયતના હિસાબો સહિત ચાર્જ લેવાના હતા. જે પહેલા જ રાત્રીના સમયે પૂર્વ સરપંચ અને તેમના પુત્રો અને પરિવારના સભ્યો પર જીવલેણ હુમલો થયો હતો.

રાતના 11 વાગ્યાના સુમારે પૂર્વ સરપંચ સુખદેવ ઠાકોરનો પુત્ર સતીષ ઠાકોર પોતાની ફેકટરી પરથી ગામમાં આવ્યો હતો. જ્યાં ભત્રીજો રાકેશ ઠાકોર પણ ગામના ભાગોળે મળ્યો હતોમ જેઓ બંને ઉભા હતા ત્યારે આયોજનબદ્ધ રીતે ચૂંટાયેલા સરપંચ નવનીત ઠાકોર અને તેમના સમર્થકોએ લાકડાં અને ડંડા સાથે અચાનક હુમલો કરી દીધો હતો. ઘટનાની જાણ પૂર્વ સરપંચ સુખદેવ ઠાકોરને થતા પોતાના પુત્રોને માર મારતા હોવાનું જાણીને ગામના ભાગોળે પહોંચ્યા હતા. જ્યાં નવનીત ઠાકોર અને તેના સમર્થકોએ જગદીશભાઈ, સુખદેવભાઈ,રાયસિંગભાઈ તેમજ વિપુલને ઘેરી લઈને માર માર્યો હતો.

સમગ્ર ઘટના બાદ ઇજાગ્રસ્તો ને નજીકની હોસ્પિટલમાં સારવાર અર્થે ખસેડવામાં આવ્યા છે. આ અંગે માંજલપુર પોલીસે બંને જૂથો વિરુદ્ધ ગુન્હો નોંધવાની તજવીજ આરંભી છે.

મહત્વની વાતએ છે કે આ અગાઉ પણ પોતાના જીવ ને ખતરો હોવાની જાણ પૂર્વ સરપંચ દ્વારા અરજી મારફતે માંજલપુર પોલીસ મથકમાં કરી હતી. જોકે પોલીસે સામા પક્ષે જવાબ લેવા સુધીની પણ તસ્દી લીધી ન હતી. ઘટનાએ આટલું મોટું સ્વરૂપ ધારણ કર્યું છતાંય પોલીસે ફક્ત તમાશો જ જોયો હોવાના આક્ષેપ પૂર્વ સરપંચ સુખદેવ ઠાકોરે કર્યા હતા.