• નગરમાં ડ્રેનેજ સુવિધા હોવા છતાંય દૂષિત પાણી રસ્તા પર વહે છે.
• અનેક શાસકો બદલાયા પણ સાવલી નગરની સ્થિતિમાં કોઈ ફેરફાર નહીં
• ઉભરાતી ડ્રેનેજલાઈન તત્કાલીન સત્તાધીશોના ભ્રષ્ટાચારની સાક્ષી પુરાવે છે

વડોદરા જીલ્લાના સાવલી નગરમાં ઉભરાતી ડ્રેનેજ લાઇનને કારણે અનેક વિસ્તારોમાં દુર્ગંધ અને પારાવાર ગંદકી ફેલાઈ છે. હાલ પાલિકાની સત્તા ભારતીય જનતા પાર્ટીના શાસકો પાસે છે. જેથી સુશાસન સપ્તાહની ઉજવણીમાં નગરપાલિકાની આ સિદ્ધિને એક વાર યાદ તો કરવી જ પડે..

વર્ષોથી સાવલી નગરમાં વસતા નાગરિકોને પારાવાર ગંદકીનો સામનો કરવો પડે છે. સમગ્ર નગરમાં ભૂગર્ભ ગટર યોજના અંતર્ગત ડ્રેનેજ લાઇન નાખવામાં આવી છે છતાંય તેની ગુણવત્તા પર પ્રશ્નો ઉભા થયા છે. જે પ્રમાણે કામગીરી થવી જોઈએ તેવી કામગીરી નહીં થવાને કારણે લોકો ત્રાહિમામ પોકારી ઉઠ્યા છે.

વર્ષો વીતી ગયા,શાસકો બદલાતા ગયા પણ સમસ્યા ઠેર ની ઠેર છે. નગરમાં એક પણ એવો માર્ગ નહીં હોય જે એક સપ્તાહ સુધી સૂકો રહ્યો હોય, અહીં ઉભરાતી ડ્રેનેજ અને રસ્તા પર વહેતા દૂષિત પાણીને કારણે નગરની હાલત કફોડી બની છે. સ્પષ્ટ બહુમતી હોવા છતાંય ભાજપના શાસકો નગરના વિકાસમાં ઉણા ઉતર્યા છે. જ્યારે આવી સ્થિતિ હજી કેટલો સમય સુધી રહેશે તે કહેવું પણ મુશ્કેલ છે.