NRG
એટલાન્ટાની ગોકુલધામ હવેલી સાથે જોડાયેલા દંપતીનું અનોખું સેવાકાર્ય
- ધર્મ-સમાજની પ્રવૃત્તિમાં ઉંમરનો બાધ ફગાવનાર તેજસ-અમી પટવા યુવાનો માટે પ્રેરણારૂપ
- ધર્મ-સમાજના કાર્ય માટે ઉંમરનો બાધ નડતો નથી તેવું પટવા દંપતીએ સાબિત કર્યું
- ગોકુલધામ હવેલી નિર્માણનો સંકલ્પ કરી તેને પૂર્ણ કરનાર તેજસ-અમી પટવાની સાથે 100 કપલ ઉત્સાહ સાથે કાર્ય કરે છે
દિવ્યકાંત ભટ્ટ. એટલાન્ટા
ધર્મ અને સમાજનું કાર્ય મોટાભાગે સિનિયર સિટિઝન જ કરતા હોય એવી એક વાત સૌએ સ્વીકારેલી છે. પરંતુ અમેરિકાના એટલાન્ટા સિટીમાં સ્થપાયેલી ગોકુલધામ હવેલી સાથે યુવાવસ્થાથી જોડાયેલા દંપતી તેજસ અને અમી પટવાએ ધર્મ-સમાજના કાર્ય માટે ઉંમરનો બાધ નડતો નથી તેવું સાબિત કર્યું છે. એટલું જ નહીં અનેકવિધ સેવાકીય કાર્યોમાં અગ્રેસર રહેતું પટવા દંપતી યુવાનો માટે પ્રેરણારૂપ બન્યા છે.
વડોદરા(ગુજરાત)ની શ્રી કલ્યાણરાયજી હવેલીના ષષ્ઠપીઠાધીશ્વર વૈષ્ણવાચાર્ય પૂ. શ્રી દ્વારકેશલાલજી મહારાજશ્રીના માર્ગદર્શન હેઠળ એટલાન્ટાની ગોકુલધામ હવેલી સ્થપાઇ છે. 2017 માં સુબોધચંદ્ર શાહ, અશોક પટેલ અને ભૂપેન્દ્ર પટેલ(બોબી પટેલ)ના સહકાર સાથે શરૂ થયેલી ગોકુલધામ હવેલી પાંચ વર્ષમાં આધ્યાત્મિક, સાંસ્કૃતિક, શૈક્ષણિક, અને સામાજિક પ્રવૃત્તિઓનું કેન્દ્ર બની છે. જેની સફળતામાં અનેક વૈષ્ણવોએ તન-મન અને ધનથી કરેલી સેવા મહત્ત્વની છે.
જો કે, 38 વર્ષની યુવાવયે ગોકુલધામ હવેલીના નિર્માણનો સંકલ્પ કરી આ કાર્ય પૂરું કરવા માટે સમય-શક્તિનું બલિદાન આપનાર તેજસ પટવાના કાર્યથી કોઇ અંજાણ નથી. ગોકુલધામમાં દર વર્ષે સાંસ્કૃતિક પ્રોગ્રામ ‘નમસ્તે’, પોંક-ઊંધિયું ઉજાણી, હોલી-રંગોત્સવ, સમર કેમ્પ, જીવન સાથી પસંદગી સંમેલન, હિંડોળા ઉત્સવ, અન્નકૂટ મનોરથ જેવા અનેક મોટા આયોજનો થતા રહે છે. સાથે સાથે ગોકુલધામ વિદ્યાલયની પ્રવૃત્તિ જ તો ખરી જ ! વર્ષ 2008 થી હાલ 2022 સુધી ગોકુલધામના આ દરેક કાર્યમાં એક્ઝિક્યુટિવ સેક્રેટરી તેજસ પટવા સતત દોડતા જ રહ્યા છે. તેમના કાર્યથી પ્રેરાઇને તેમની સાથે ટીમમાં સામેલ 30 થી 50 ની વયજૂથના 100 જેટલાં કપલ દરેક નવી ઇવેન્ટને નવા જોમ-જુસ્સાથી સફળતાની નવી ઊંચાઇ અપાવે છે.
તેજસ પટવા કહે છે, જીવનમાં આધ્યાત્મિકતાનો સ્પર્શ યુવાનીમાં જ થઇ જવો જોઇએ. આ માટે ઉંમરનું કોઇ બંધન નડતું નથી. જ્યારે શરીરમાં હણહણતા અશ્વ જેટલી તાકાત હોય ત્યારે જ ધર્મ અને સમાજ માટે કંઇ કરવાનો સંકલ્પ લઇ તેની પૂર્તતા માટે સમય-શક્તિનું બલિદાન આપવું જોઇએ. પૂ.દ્વારકેશલાલજી મહારાજ હંમેશા યુવાનોને પ્રેરણા આપે છે. તેમની પ્રેરણા અને આશીર્વાદ થકી હું નાની ઉંમરે હવેલી નિર્માણનું સ્વપ્ન જોઇ તેને હું પૂરું કરી શક્યો.
વર્ષમાં મોટાભાગના શનિ-રવિવારનો સમય તેજસ પટવા અને તેમના ધર્મપત્ની અમી પટવા ગોકુલધામની પ્રવૃત્તિમાં જ વિતાવે છે. પટવા દંપતીને હવેલીના ઉત્થાન અને પ્રગતિ માટે નીતનવા િવચારો સાથે સતત પ્રવૃત્તિશીલ રહેતા જોઇ નવા યુવા સ્વયંસેવકો જોડાઇ રહ્યા છે. ખાસ કરીને ગોકુલધામ વિદ્યાલયમાં યુવા સ્વયંસેવકોના સપોર્ટથી વિદ્યાલયનું નામ ગુંજતું થયું છે.
તેજસ પટવા એક વ્યક્તિ નથી સંસ્થા છે : પૂ.દ્વારકેશલાલજી મહારાજ
તેજસ પટવા આ એક વ્યક્તિ નથી સંસ્થા છે. એક આખી સંસ્થા સ્વરૂપે આ વ્યક્તિના મનમાં રોજ નવા વિચારો ઉદ્્ભવે છે, તેને મૂર્તિમંત કરવા આ પ્રતિભા રોજ પરિશ્રમ કરે છે. વૈષ્ણવોનો મનોરથ હતો કે, ગોકુલધામ હવેલી થાય, આ મનોરથ પૂરો કરવા તેજસભાઇએ ઘણો પુરુષાર્થ કર્યો છે.
- પાંચ ભાવ પૈકી કોઈ એક ભાવથી પ્રભુને ભજીશું તો આ જીવાત્મા પરમાત્માથી અળગો રહી શક્તો નથી : દ્વારકેશલાલજી
- ગોકુલધામમાં પૂ.દ્વારકેશલાલજીના સાંનિધ્યમાં શ્રીકૃષ્ણ જન્મોત્સવ-નંદ ભવન ઉત્સવ ઉજવાયો
- કૃષ્ણનું ભયથી નામ સ્મરણ કરનાર કંસની મુક્તિ થતી હોય તો ભક્તિ કરનારનો હાથ અને સાથ કૃષ્ણ ક્યારેય છોડતા નથી : પૂ.દ્વારકેશલાલજી
દિવ્યકાંત ભટ્ટ તરફથી, એટલાન્ટા
અમેરિકાના એટલાન્ટા સિટીમાં આવેલી ગોકુલધામ હવેલીમાં 3 વર્ષ બાદ વૈષ્ણવાચાર્ય પૂ.દ્વારકેશલાલજી મહારાજના પુન: આગમન પ્રસંગે શ્રીકૃષ્ણ જન્મોત્ત્સવ-નંદ ભવન ઉત્ત્સવની આનંદ-ઉત્સાહ સાથે ભક્તિભાવપૂર્વક ઉજવણી કરાઇ હતી.આ પ્રસંગે આયોજિત શ્રીકૃષ્ણ ચરિતામૃત સત્સંગમાં પૂ.દ્વારકેશલાલજી મહારાજશ્રીએ ભક્તિના પાંચ ભાવનું વર્ણન કરી સમજાવ્યું હતું કે, પાંચ ભાવ પૈકી કોઇ એક ભાવથી પ્રભુને આપણે નિત્ય ભજીશું તો આ જીવાત્મા પરમાત્માથી ક્યારેય અળગો રહી શક્તો નથી.
ગોકુલધામ હવેલીમાં મંગળવારની ઢળતી સાંજે વડોદરાના શ્રી કલ્યાણરાયજી મંદિરના ષષ્ઠ પીઠાધિશ્વર પૂ.દ્વારકેશલાલજી મહારાજશ્રીના સાંનિધ્યમાં શ્રીકૃષ્ણ જન્મોત્સવ અને નંદ ભવન ઉત્સવની ઉજવણી કરાઇ હતી. પૂ.શ્રીએ ચાંદીના પલનામાં શ્રીઠાકોરજીને ઝુલાવતાં આ દર્શનનો લ્હાવો લઇ ગોકુલધામના વૈષ્ણવ શ્રદ્ધાળુઓ ધન્ય બન્યા હતા. ગોકુલધામની સજાવટ ટીમ દ્વારા આ પ્રસંગે તૈયાર કરાયેલું નંદ ભવનનું ડેકોરેશન આકર્ષણનું કેન્દ્ર બન્યું હતું. આ વેળા શ્રદ્ધાળુઓએ ‘નંદ ઘેર આનંદ ભયો, જય કનૈયાલાલકી’ નો જયઘોષ કરી શ્રીકૃષ્ણ જન્મોત્ત્સવનો આનંદ લૂંટ્યો હતો.
શ્રીકૃષ્ણ જન્મોત્ત્સવ બાદ ગોકુલધામના શ્રીજગદગુરુ હોલમાં શ્રીકૃષ્ણ ચરિતામૃત સંત્સંગનું આયોજન કરાયું હતું. પૂ.દ્વારકેશલાલજી મહારાજશ્રીએ કૃષ્ણની ભક્તિ વાત્સલ્ય ભાવથી, સખ્ય(મિત્ર)ભાવથી, માધુર્ય(પ્રેમ) ભાવથી, દાસ ભાવથી અને શાંત ભાવથી કરવા જણાવ્યું હતું. આ પાંચ પૈકી કોઇ એક ભાવથી પણ પ્રભુને ભજીશું તો આ જીવાત્મા પરમાત્માથી અળગો રહી શક્તો નથી. પૂ.શ્રીએ કહ્યું હતું કે, કંસ દ્વારા ભયથી પણ કૃષ્ણનું નામ લેવાયું હતું તો પણ તેની મુક્તિ થતી હોય તો જે ભક્તિ ભાવે કૃષ્ણને ભજે છે તેનો હાથ અને સાથ કૃષ્ણ ક્યારેય છોડતા નથી.
પૂ.શ્રીએ રાત્રે સૂતી વખતે ક્ષમા કરી દઇશું અને ક્ષમા આપી દઇશું તો પ્રભુને અતિ આનંદ થશે તેમ કહ્યું હતું.પૂ.શ્રીએ હ્રદયરૂપી ખેતરમાં કૃષ્ણરૂપી બીજનું વાવેતર કરીશું અને તેમાં પ્રેમની માટીથી એને આપણે સિંચીશું, સત્સંગના ખાતરથી તેનું પોષણ કરીશું, કિર્તનના જળથી પોષણ આપીશું અને સેવાના પવન-વાયરા વાતા રહેશે તો કૃષ્ણરૂપી બીજ પલ્લવિત-અંકુરિત થશે.આ બીજ ઉપર ભક્તિરૂપી ફળ લાગશે તેનાથી આપણે અળગા રહી શકીશું નહીં.
આ પ્રસંગે મુખ્ય મનોરથી કામિની અને તુષાર પટેલ, સહ મનોરથી બેલા અને બિરેન શાહનું સન્માન કરાયું હતું. પૂ.દ્વારકેશલાલજી મહારાજશ્રીએ આ ટાણે ગોકુલધામ હવેલીના એક્ઝિક્યુટિવ સેક્રેટરી તેજસ પટવાને ઓનરરી ડૉકટરેટની પદવી મળી હોવાનું જાહેર કરતાં વૈષ્ણવોએ આ જાહેરાતને વધાવી લીધી હતી.
કાર્યક્રમમાં ગોકુલધામના ચેરમેન અશોક પટેલ, એક્ઝિક્યુટિવ સેક્રેટરી તેજસ પટવા, ટ્રેઝરર કિન્તુ શાહ, જીગર શાહ, સુબોધ શાહ, ડૉ. ઇન્દ્ર શાહ, હેતલ શાહ, સમીર શાહ, અલકેશ શાહ, કેતુલ ઠાકર, હિતેશ પંડિત, આત્મય અને આર્ષ તલાટી સહિત અનેક હોદ્દેદારો ઉપસ્થિત રહ્યા હતા.
પ્રેમિકાના ઘરે ગયેલા યુવકને ઇજાગ્રસ્ત હાલતમાં હોસ્પિટલમાં ખસેડયા બાદ શંકાસ્પદ મોત
હિંસક કપિરાજનો આતંક,વૃદ્ધાને કરડી જતા રહીશોમાં ભય નો માહોલ
50 હજાર ઉપરાંતની લીડથી જીતનાર ઉમેદવારોની યાદીમાં મારુ નામ પહેલું હશે- મધુ શ્રીવાસ્તવ
વડોદરામાં પણ મુખ્ય રસ્તા ઉપર વેચાતા નોનવેજની લારી બંધ કરવા ફરમાન
ત્રીજી લહેરની દસ્તક? : વડોદરામાં અમદાવાદ કરતા બમણા એક્ટીવ કેસ
