એક મૂર્તિ પગના ભાગથી તોડી અને બીજી મૂર્તિમાં અંગુઠાનો ભાગ ખંડિત કર્યો

વડોદરાના કરજણ નજીક આવેલા નારેશ્વર ધામમાં નર્મદા નદીના કિનારે આવેલ ઘાટ પર સ્થાપિત રંગવધૂત મહારાજની બે મૂર્તિઓને અસામાજીક તત્વોએ ખંડિત કરતા ચકચાર મચી ગઇ ગઇ છે.

ઘટનાની પ્રાપ્ત વિગતો અનુસાર નારેશ્વર ખાતે નર્મદા નદીના કિનારે આવેલ શ્રી રંગ સેવા ઘાટ પર પૂજ્ય રંગઅવધૂત મહારાજની બે મૂર્તિઓ વર્ષ 2009માં સ્થાપિત કરવામાં આવી હતી. જેમાં આશરે ચાર ફૂટની એક મૂર્તિ હતી જેને અસામાજીક તત્વોએ પગના ભાગથી જ તોડી નાખી હતી. જ્યારે ઘાટની દિવાલમાં અંકિત કરવામાં આવેલો એક મૂર્તિનો અંગુઠાનો ભાગ ખંડિત કરી નાખ્યો હતો. મોડી રાત્રે કોઇએ આ કૃત્ય કર્યું હોવાનું હાલ જાણવા મળ્યું છે.

પોલીસ, ધારાસભ્ય ઘટનાસ્થળે દોડી આવ્યા
ઘટનાને પગલે પોલીસ અને ડોગ સ્ક્વોડ ઘટના સ્થળે દોડી આવ્યા હતાં અને તપાસ શરૂ કરી છે. બીજી તરફ કરજણના ભાજપના ધારાસભ્ય અક્ષય પટેલ પણ નારેશ્નર ખાતે આવી ગયા હતા અને પરિસ્થિતિનું નિરિક્ષણ કર્યું હતું. અસામાજીત તત્વો દ્વારા રંગઅવધૂત મહારાજની બે મૂર્તિઓ ખંડિત થતાં ભક્તો અને અનુયાયીઓમાં રોષની લાગણી ફેલાઇ છે.