• 383 પોલીસ કર્મીઓના આરોગ્યનું નિદાન: 13 દર્દીઓને રીફર કરાયા
• જિલ્લાના 51 જેટલા સરકારી દવાખાનાઓ ખાતે નિરામય અભિયાનની કામગીરી કરવામાં આવી
• આરોગ્ય કેમ્પમાં 1083 સ્ક્રીનીંગ અને 817 બ્લડ સેમ્પલ લેવા આવ્યા

શુક્રવાર ને નિરામય દિવસ તરીકે નિર્ધારિત કરવામાં આવ્યો છે.તેના ભાગરૂપે આજે જિલ્લા આરોગ્ય તંત્ર દ્વારા ૩૦+ ની ઉંમરના લોકોની સાથે જિલ્લા પોલીસ દળમાં કાર્યરત અધિકારીઓ અને કર્મચારીઓની આરોગ્ય તપાસ કરીને નિરામય હેલ્થ કાર્ડ બનાવવામાં આવ્યા હતા.નિરામય આરોગ્ય અભિયાન હેઠળ ઉપરોક્ત વય જૂથના લોકોને ડાયાબિટીસ,બ્લડ પ્રેશર,કેન્સર,હૃદયરોગ જેવી જીવન શૈલી સાથે સંકળાયેલા રોગો સામે સુરક્ષિત કરવા વિવિધ પ્રકારની આરોગ્ય તપાસ કરીને દરેક લાભાર્થીનું હેલ્થ કાર્ડ બનાવવામાં આવે છે.

તે પ્રમાણે આજે જિલ્લાના 51 જેટલા સરકારી દવાખાનાઓ ખાતે નિરામય અભિયાનની કામગીરી કરવામાં આવી હતી તેમ મુખ્ય જિલ્લા આરોગ્ય અધિકારી ડો.સુરેન્દ્ર જૈને જણાવ્યું છે. તેમણે આજે કરજણ,પોર,વરણામા જેવા કેન્દ્રો ખાતે નિરામય હેઠળ આરોગ્ય તપાસ અને હર ઘર દસ્તક અભિયાન હેઠળ કોરોના રસીકરણ નું નિરીક્ષણ કરીને વધુ સારી કામગીરીનું માર્ગદર્શન આપ્યું હતું.નિરામય હેઠળ જિલ્લામાં તબક્કાવાર ઉપરોક્ત વય જૂથના 5 લાખથી વધુ લોકોની આરોગ્ય તપાસ કરવાનું આયોજન છે.હર ઘર દસ્તક અભિયાન હેઠળ રસીકરણ સ્થળો ખાતે જેઓએ પહેલા અથવા બીજા ડોઝ ની રસી લીધી નથી એમને યોગ્ય રીતે સમજાવીને રસી લેવા માટે પ્રોત્સાહિત કરવામાં આવ્યા હતા.

મુખ્ય જિલ્લા આરોગ્ય અધિકારી ડો.સુરેન્દ્ર જૈને જણાવ્યું કે આ નિરામય આરોગ્ય કેમ્પમાં 1083 સ્ક્રીનીંગ અને 817 બ્લડ સેમ્પલ લેવા આવ્યા હતા.જેમાં ડાયાબીટીસના 153,હાયપરટેન્શનના 134,એનીમિયાના 27, કિડનીની બિમારીના 19 અને અન્ય બીમારી 49 સહિત કુલ 383 પોલીસ કર્મીઓના આરોગ્યનું નિદાન અને સારવાર કરવામાં આવી હતી.આ કેમ્પનો કુલ 1083 પોલીસ કર્મચારીઓએ લાભ લીધો હતો.13 દર્દીઓને રિફર કરવામાં આવ્યા હતા.